25.11.2011, 14:53 Почна новогодишното китење на центарот
Ангажираната фирма за новогодишно украсување на центарот на градот „Линк медија плус“ од денеска почна да ги монтира украсите по градските булевари. Поставени се неколку висечки ѕвончиња изработени од вештачко зеленило на канделабрите на булеварите „Гоце Делчев“ и „Даме Груев“. Покрај овие два булевара, новогодишен декор е планиран и за булеварот „Илинден“ до крстосницата со улицата „Франклин Рузвелт“, ќе се украсува и булеварот „Партизански одреди“ се' до крстосницата со булеварот „8 Септември“ како и улиците „Димитрија Чуповски“, „11 Октомври“, „ВМРО“ и „Васил Аџиларски“. Во новогодишен амбиент ќе светне и просторот пред Владата, платото пред Универзална сала, просторот пред Судска палата како и платото пред Националната галерија „Чифте-амам“.
Од „Линк медија плус“ имаат обврска новогодишниот амбиент да го изведат до 15 декември. Традиционално, празничното руво ќе трае до православна Нова година.
Годинава елката ќе биде поставена на Плоштадот. Ќе се искористи истата од лани, но со некористени украси досега. И за комплетното украсување на центарот, од „Линк медија плус“ најавија дека ќе користат нови украси, дел од нив изработени од вештачко зеленило и ��енерално сите осветлени во бела боја. Нема да се китат спомениците. За годинава е планиран шестминутен огномет. (Дс.Т.)
|
