24.11.2011, 12:12 Северна Кореја и се закани на Јужна со воен напад
Северна Кореја се закани денеска дека ќе ја претвори претседателската палата во Сеул во „огнено море“.
Ова предупредување следеше откако вчера Јужна Кореја спроведе масовни воени вежби во близина на остров во регионот на границата меѓу двете земји, кој пред една година беше нападнат од Пјонгјанг. Во тогашниот севернокорејски напад на островот Јеонпјеонг беа убиени четворица Јужнокорејци - двајца војници и двајца цивили.
Севернокорејската армија се закани денеска дека слично „огено море“ може да го зафати Синиот дом, како што се нарекува претседателската палата во Сеул, доколку јужнокорејските сили истрелаат дури и еден куршум на територијата на Северна Кореја.
Северот го обвини Југот дека ги испровоцирал минатогодишните напади, бидејќи го ингорирал предупредувањето да не спроведува воени вежби со боева муниција во спорниот регион.
Денешната закана е упатена во момент кога има знаци на намалување на тензиите меѓу Пјонгјанг и Сеул и во пресрет на обидите на дипломатите да ги обноват шестстраните преговори за севернокорејската нуклеарна програма.
|
