25.11.2011, 13:18 Најчеста злупотребата на личните податоци од социјалните мрежи
Предизвиците на институционална заштита на личните податоци од аспект на развој на потребните механизми со цел подобрување на правата на граѓаните на заштита на личните податоци, како и спречување на нивната злоупотреба е целта на Меѓународната конференција што денеска во Скопје ја организира Дирекцијата за заштита на личните податоци со поддршка од Делегацијата на ЕУ.
В.д. шефoт на Мисијата на ЕУ во Македонија Роберт Лидл во своето воведно излагање истакна дека можностите што ги нудат современите средства за комуникација носат и ризици особено за нарушување на приватноста и на идентитетот на личноста, затоа, посочи, ЕУ се залага за заштита на личните податоци кое е фундаметлано право на човекот.
- Во ЕУ се усвоени директиви за заштита на личните податоци како и начела кои треба да бидат примени во земјите членки на Унијата, но се надеваме и на потполна хармонизација и надвор од границите на ЕУ. Во Македонија гледаме успешни чекори во заштитата на личните податоци. Во таа насока Дирекцијата работи напорно на примената на ваквите права за заштита на личните податоци, со цел за понатамошна хармонизација на земјата во ов��а област, рече Лидл.
Заштитата на личните податоци, додаде тој, не може да зависи само од Дирекцијата како стратешки регулатор, кој ги подобрува своите капацитети во преземање на заштита на личните податоци, туку и од другите агенции кои треба да земат учество во оваа област, а ги вклучуваат пасошите, личните документи...
Според претставникот од Секретаријатот за европски прашања Јован Андоновски, реформите кои се спроведуваат во насока на заштита на личните податоци од страна на ДЗЛП ќе бидат клучни за адаптација на земјата во сеопфатниот дигитален свет во кој што живееме и ја поздрави Стратегија за заштита на личните податоци 2012 – 2016 како рамковен стартешки документ кој ќе обезбеди натамошно јакнење на заштитата на личните податоци во Македонија.
- Особено е значаен пристапот кој го промовира Стратегијата, а кој предвидува обезбедување целосна транспонираност на европската легислатива за заштита на личните податоци во националното законодавство, зголемување на јавната свест за потребата од заштита на личните податоци, ефикасен надзор над законитоста на обработката на личните податоци, континуирана обука за контролорите и обработувачите на личните податоци и јакнење на капацитетот на Дирекцијата, рече Андоновски.
Директорот на ДЗЛП Димитар Ѓеорѓиевски посочи дека покрај Стратегијата со Акцискиот план за нејзино спроведување, денеска ќе биде презентирано и Истражувањето за свеста на медиумите за подобрена имплементација на правото за заштита на личните податоци. Анализата утврдила дека треба многу да се вложи и во Дирекцијата и кај медиумите за почитување на правото на приватност кај граѓаните, бидејќи, подвлече, ова право е резервирано само за физичките лица, за поединецот.
- Во последно време претставките поврзани со злоупотребата на личните податоци од социјалните мрежи предничат пред останатите. Но, исто така, не заостануваат и претставките кои се во врска со злоупотреба на податоци од областа на телекомункации, банкарски сектор, од здравен и осигурителен сектор. Имаме полни раце работа, но сметаме дека со превентивно делување и преку едукација на сите на кои се однесува ова право можеме да постигнеме подобри резултати, рече Ѓеорѓиевски.
Стратегијата и Истражувањето за свеста на медиумите за подобрена имплементација на правото за заштита на личните податоци, се подготвени од ДЗЛП во рамки на ИПА проектот од 2008 за поддршка на Дирекцијата. На Меѓународниот форум, учествуваат претставници на органи и институции за заштита на личните податоци од Советот на Европа и повеќе земји од регионот и од Европа.
|
