24.11.2011, 13:49 Франција предлага воена интервенција во Сирија
Париз го призна опозицискиот Сириски национален совет и предложи меѓународни сили да креираат безбедна зона за цивилите.
Како директно ехо од предходните настани во Либија, Франција и официјално го призна опозицискиот Сириски национален совет и предложи меѓународни сили да креираат безбедна зона за цивилите. Францускиот министер за надворешни работи Алан Жипе ја сигнализираше промената во политиката на средбата, во средата, со лидерот на СНЦ, Бурхан Галион во Париз. „Сирискиот национален совет е легитимен соговорник со кој ние ќе продолжиме да соработуваме“, изјави Жипе пред новинарите. Тој забележа дека либиски тип на зона на забранети летови „не е на агендата“ бидејќи „вооружена реакција би можела да предизвика вистинска граѓанска војна“. Но додаде: „Ќе се консултираме со нашите европски партнери за можноста за почнување хуманитарни операции за ублажување на страдањата на населението...Дали треба да креираме хуманитарни коридори, или хуманитарни зони?“
Коментирајќи го развојот на настаните, Галион изјави: „Не можевме да добиеме поголемо, позначајно признавање од она што министерот тукушто го кажа...Ние сме признати“.
Предходно посочените пречки за воена акција во Сирија беа недостиг на мандат на ОН, немање арапска поддршка за надворешна интервенција и тактички проблеми. Но пречките почнуваат да се топат.
Во однос на тактиката, креирање на „хуманитарни зони“ од типот на оние на Жипе, заштитени од меѓународни сили, е во согласност со француското воено размислување за тоа како да се собори сирискиот претседател Башар Асад. Извор во француската армија за „ЕУ Обзервер“ изјави: „Нема волја да се спроведе зона на забранети летови или тампон зона. Невозможно е да се имитира Либија во Сирија, поради теренот кој би го отежнал одвивањето на воздушните операции. Но, точните зборови што ги слушнав (од колегите) беа: ’ако сириските бунтовници успеат да задржат позиција (слично на Бенгази во Либија) сите карти се на маса‘“. (ЕУ Обзервер)
|
