24.11.2011, 12:35 Турција го цензурира интернетот
На турските корисници на интернет достапни им се содржини кои поминале одреден „филтер“. Тој филтер требаше да биде воведен уште пред три месеци, но многу брзо се покажа дека голем дел од општеството не сака така лесно да се помири со плановите на турските власти.
Во Турција се организираа протести. Десетици илјади граѓани се спротивставија под слоганот: „Не ми го менувај интернетот!“. Планираното ограничување на пристап на материјали објавени на интернет остро го критикуваа и медиумите, а бидејќи во јуни на распоред беа избори – целата работа се одложи за 22 ноември, наводно поради „технички причини“.
Основата за воведување на филтер е новиот член за заштита на потрошувачите кој е донесен во рамки на Законот за електронска комуникација. Според тој член од Законот, младите и децата треба да се заштитат од „недолични содржини“ на интернет.
Покрај тоа, според наводите на турските власти, треба да се спречи и „сепаратистичката пропаганда“ од курдската терористичка организација ПКК.
Единаесет члена работна група состави долга листа на „штетни“ поими. Спротивно на барањата на медиумските здруженија и невладините организации, во неа ��е биле застапени независни експерти, туку само вработени во Министерството за информирање и семејство.
На црната листа се наоѓаат повеќе од 130 поими, меѓу кои се порно, секс, потоа англиските зборови adult, fetish, escort, hot, tееn, gay...
Забранети се и турски изрази за голо, жешко, признание, свекрва, маќеа или инцест. Посебен куриозитет е дека е забранет и зборот – забрана?!
За воведувањето на „филтер“ на интернет во Турција задолжена е националната институција за регулирање на телекомуникации ТИБ. Таа на корисниците им нуди разни безбедносни опции како што се „детски пакет“, „семеен пакет“ или „домашен пакет“.
Се уште не е јасно што точно тие пакети треба да содржат. Прво било замислено секој корисник на интернет да мора да избере еден од тие три пакети, а кој нема да се одлучи за ниту еден од нив, автоматски треба да добие „основен пакет“, со наводно „поумерен филтер“.
Според наводите на ТИБ, сега тоа автоматско доделување на пакет повеќе не се предвидува. „Основен пакет“ нема да има, а досегашната слобода за пристап на интернет за тие кои не се одлучиле за ниту еден безбедносен пакет, треба да остане непроменета.
Пристапот на интернет во Турција и без овој нов филтер во последно време е ограничен. Законот за интернет-страниците и спречувањето на криминал на интернет дозволува врз основа на сомнеж да се блокира пристапот до одредени портали.
Истовремено, тој закон им дозволува на тие кои сметаат дека со одредени содржини на интернет се крши нивното право на почитување на приватност да побараат блокада на тие содржини.
Според податоците со кои располага организацијата „Репортери без граници“, во Турција моментно воопшто не може или само ограничено може да се влезе на 7.000 портали. И пристапот на ЈуТјуб во повеќе наврати беше блокиран.
Поради цензурата „Репортери без граници“ Турција ја ставија на листа „непријатели на интернетот“. Во категоријата земји кои се „на мониторинг“ се наоѓаат и Русија, Австралија, Франција и Јужна Кореја.
|
