Семејна војна за богатството на Тито



Јованка, синот мишо, 12 внуци и правнуци не знаат колку ќе добијат од богатството наводно тешко 60 милиони долари

Кому ќе му припадне златната кочија со впрегнати коњи и осум метри долгата низа од бисери? Јосип Броз Тито почина во 1980 година, а 30 години подоцна белградскиот суд треба да одлучи како ќе го подели меѓу неговата вдовица, синовите и внуците, имотот кој се проценува на 60 милиони долари.

Првиот основен суд во Белград нема да го дели само имотот кој остана во Србија, туку и оној во Хрватска: така ќе бидат поделени и автомобилите од гаражата на Бриони, пишуваат белградски „Вечерње новости“.

Освен во вилите на Тито на Дедиње и на Бриони, дел од имотот кој сега ќе се дели меѓу Јованка Броз и други наследници, се наоѓа во музејот во Кумровец, пренесуваат белградските медиуми.

Освен Јованка, наследници се синот Мишо и децата на покојниот син Жарко, Јошка, Златица и Светлана. Ќерката на Мишо, Саша Броз изјави дека ништо не знае за рочиштето во Белград: „Презафатена сум со театарот и не ме интересира што се случува“. Кон крајот на минатиот месец одржано е првото рочиште, а следното е закажано за 23 декември.

На рочиштето се појавија и децата на Жарко, Јошка, Златица и Светлана и правните застапници на Јованка Броз. „На рочиштето добивме попис на имотот кој треба да биде поделен, а такви пописи им се испратени и на Мишо и Едвард. И застапниците на Јованка на судот му доставија попишан имот за кој бараат да биде исклучен бидејќи тврдат дека се во прашање нејзини лични предмети“, изјави Јошка Броз за „Новости“.

На пописот што го добија има накит, униформи, ордени, садови, сребро, набројуваше Јошка Броз. Тој попис е направен во 2002 година. Јованка Броз на тоа му додаде уште еден попис, со околу 1.000 предмети кои според нејзино мислење и припаѓаат нејзе и не треба да бидат вклучени во поделбата со останатите наследници. Меѓу останатото, таа бара скапоцености од Бриони и Ванга.

Од целокупниот Титов имот налседниците досега ги наплатија само авторските права, тврди Јошка Броз, бидејќи секој уште одамна добил по 4.000 тогашни германски марки. Во Југославија се сметаше дека зад Тито и не останал приватен имот, туку дека сето тоа е заедничка општествена сопственост. Единствено Жарко го наследи лозјето покрај Кумровец. Другиот син Мишо наводно со години водеше спор околу куќата кај Сомбор, што Тито сакаше да му ја остави, но остана во сопственост на градот Загреб. Сега ќе се делат златните часовници и сребрените вилушки, златната кочија од Ѓаково, „ролс ројсот“, белиот кадилак и линколн, камен од Месечината и Сталиновите одрени. (Јутарњи лист)