Една песна за Калиопи



Нашата евровизиска претставничка во месец февруари ќе ја претстави песната со која ќе настапи во Азербејџан

Валентина Тодоровска

Во февруари ќе ја слушнеме песната со која Калиопи ќе настапи на Евровизискиот фестивал во Азербејџан, а јазикот на кој ќе се пее - ќе биде македонски, беше кажано на вчерашната прва средба на Калиопи со новинарите, во која нашата официјална евровизиска претставничка одговори на најразличните прашања поставени од седмата сила.

„Со изборот на една песна, со ваков модел се спречуваат разни шпекулации и е едно од решенијата целата енергија да се насочи на една музичка тема, а јас со целиот досегашен музички багаж ќе дадам се' од себе тоа да биде достоинствено претставување на Македонија“, рече Калиопи.

Околу самиот избор на песната таа ја раскажа желбата на своите фанови да настапи со балада, во таа насока ја спомна и француската претставничка Патриција Кас, која сама на евровизиската сцена направи чудо со извонредна интерпретација и видлива емоција. Секако, тема на размислување се и поп-песна, ама и композиција во која ќе има и многу од традиционалниот мелос. Тоа беше и јавен повик до сите автори што сакаат да напишат нешто за Калиопи.

Да потсетиме - претстојното 58. издание на најголемиот празник на европската песна „Евросонг“ традиционално ќе се случува во мај, овој пат во новоизградената кристална палата „Баку“ во Азербејџан.

Македонската радио-телевизија, како полноправна членка на Европската радиодифузна унија, за разлика од минатите години, кога изборот беше фестивалски, годинава реши да го одвои Скопскиот фестивал од домашниот Избор за песна на Евровизија, како посебен проект. Како што кажа Петар Ѕалев, главен и одговорен уредник на Првиот канал, одлуката е донесена по многуте направени анализи, а целта е да се подигне реномето на двете музички изданија. Патем веќе и се знае датумот на Скопскиот фестивал, кој е закажан за 13 ноември следната година.

На конференцијата за печатот, Калиопи призна дека се чувствува како на почетокот на кариерата – имено, во истото студио на МРТВ, во 1985 година таа беше првата гостинка во Утринската програма, по што и тргна музичката кариера, патувањата, концерти и, пред се', почнаа да се раѓаат најубавите песни.

„Ми треба вашата позитивна енергија и монолитност“, беше коментарот на Калиопи на едно од прашањата кое се однесуваше на 2004 година, кога нашиот претставник беше Тоше, наводно, беше бојкотиран од Калиопи како автор. „Ова е нашата заедничка приказна, македонска, да бидеме сложни, да протече убавата енергија како кога настапуваа нашите кошаркари, и така сплотени да тргнеме на ’Евросонг‘“.

Искрени луѓе и добра енергија - тоа е она што ми треба

Велат колку луѓе, толку карактери, па и реакции. Како реагираш на недобронамерни критики?

„Како... Не ми е убаво да го слушнам тоа и не можам да кажам дека не ме повредува. Често си мислам, колку луѓето не ме познаваат кога можат да ме стават во такви контексти. Но, со тек на време и јас научив да ги селектирам реакциите, да не ставам се' на срце. Често велам, луѓе мои, сите овие 35 години колку што сум присутна на музичката сцена, а бројот не е занемарлив, не дадов една дамка да падне на ова мое животче, се' делев со вас. Зар некому пречи мојата среќа? Па сите сме на ист колосек, ова е македонска приказна... Токму затоа, без колебање, без ронка страв, со една блаженост и спокојство во мојата душа, знам дека има многу луѓе што ми даваат поддршка“.

И понатаму си аполитична?

„Јас сум ѕвезда на мојот народ, на мојата публика. Овој народ и покрај тоа што многу се занимава со политика, можел да ја открие и мојата аполитичност. Факт е дека политиката не ми значи ништо, таа ми е пречка и одземање на слободата. Секогаш ме интересирала само и единствено музиката, мојата уметност, а не политиката. Па и политичарите не знаат да прават музика и не научија да пеат во еден глас, тоа е променлива категорија, а оваа мојата останува... Кога во 1989 година се вратив во Македонија, не знаев ниту за една, ниту за друга, ниту за трета партија. Знаев за еден човек што се вика Киро Глигоров, кој вистински ја љуби оваа земја. И тој ми ја врати вербата во иднината. Јас сум пејач на народот, а не на партија. А се' друго се само шпекулации“.

Бидејќи си автор, многу често помислувам дека најмногу емоции можеш да внесеш во она што најмногу го чувствуваш, а тоа се песни со твојот потпис. Сепак, во својата кариера имаш и песни од други композитори, што не ја исклучува можноста да пееш „туѓа“ песна на „Евросонг“?

„Тоа што некој друг ја напишал песната не значи дека песната не е моја. Фасцинантен е моментот кога некој друг ќе допре до твојот внатрешен свет, намерно или ненамерно. И ’Бато‘ не е песна која јас ја напишав, но секогаш луѓето ја идентификуваат со мене. ’Црне руже‘ и ’Бар да си ту‘ се двете песни за кои музиката ја напиша Димитров, човекот со кого соработувам од 2001 година, потоа од албумот „Порака“ тука се Мирослав Рус, Дарко Јурановиќ... веќе разговарав со неколку автори, почнаа да ми пристигнуваат песни и од Белгија, Шпанија, Израел, што значи дека сите можат да учествуваат. Ако песната го има „она нешто“ што мене ќе ме плени, воопшто нема да биде важно чија е“.

Во периодот што е пред тебе ќе се „вооружиш“ со...

„Искрени и храбри луѓе. Стравови немам, одамна се надминати. За неколку дена ќе почнам интензивно да работам, да творам, таму сум најсилна и најмоќна. Таму не може никој да ме оспори и негира, затоа што таму се' е многу вистинско!“