Наградата од Лоѓ е значајна за нашата вербa



Пет минути интервју: Саша Ефтимова, балерина и кореограф

Катерина Богоева

Деновиве се вративте од полскиот град Лоѓ, со освоен Гран при на петтиот Интернационален натпревар за кореографија, во конкуренција на 14 натпреварувачи. Со што се претстави Македонската опера и балет?

- На овој Интернационален натпревар по кореографија во Лоџ, направив ново парче што се вика „Give up the Ghost“ („Испуштање душа“) кое што понатаму планирам да биде дел од трилогијата на претставата „Изгубена верба“. Морав да направам нова кореографија затоа што во пропозициите на овој фестивал бараа ново, до сега неизведувано парче. Откако го поминавме првиот круг, бевме селектирани за финале, каде што се натпреварував со кореографи од Холандија, Германија, Русија,Украина и др.земји од светот. Музиката за кореографијата е на Милан Димушевски, млад талентиран македонски музичар, кој моментално работи на музиката и за вториот дел од „Изгубена верба“.

Настапивте без балерината Мими Поп Алексова. Што значеше тоа за вас како кореограф, што мораше да промените за публиката но, и вие како дел од балетската екипа да ��е го почуствувате нејзиното отсуство?

- Навистина ми е многу жал што Мими се повреди три дена пред да заминеме. Тоа многу се одрази на мене како кореограф и нормално, влијаеше на екипата. Мораше да се прават измени. Цело време бевме под стрес, дури во еден момент мислевме да се откажеме. Но по долго размислување и советување од еден врвен педагог кој работи во странство, решивме да одиме. Ако не отидовме, ќе ја пропуштевме убава награда, која е многу значајна за мене и за мојата екипа. А верувам и за мојата национална куќа.

Во последен момент морав да менувам некои работи кои мене повеќе би ми лежеле, затоа што јас ја заменив Мими. Со напорно работење, со неизлегување од сала, на крајот се закитивме со наградата, а Мими беше духовно со нас цело време.

Дали на изјавата на членот на жирито, Гркот Алкис Рафтис дека „му било чудно но, и драго што од малата земја Македонија доаѓа таков кореограф“, некој се обиде да и даде дневно - политичка нота?

- Не би требало да ја врзуваме политиката со уметноста.Одевме под нашето уставно име Македонија, и сите така ни' се обраќаа. Драго ми е што Алкис Рафтис, претседателот на ЦИД УНЕСКО ни ја даде највисоката оценка и потврди дека во една мала земја, како Македонија има голем потенцијал и талент. Имавме позитивни критики од сите членови на жирито кои беа од Германија, Украина, Франција и Грција.