Компромитирачки бакнежи на реклама на Бенетон

Ватикан денеска ја осуди рекламата на компанијата „Бенетон“ во која папата Бенедикт Шеснаесетти и египетскиот имам Ал-Азхар се бакнуваат во уста, по што италијанската модна куќа ја повлече рекламата.

Ватикан соопшти дека рекламната кампања претставува неприфатлива провокација која ја навредува верата и предупреди дека ќе преземе мерки да го заштити ликот на папата.

„Бенетон“ соопшти дека целта на кампањата, наречена „Против омразата“, е поттикнување толеранција и „глобална љубов“.

Во кампањата се направени реклами со монтирани фотографии на кои се бакнуваат претседателите на САД и Венецуела, Барак Обама и Уго чавес, Обама и кинескиот претседател Ху Џинтао, германската канцеларка Ангела Меркел и францускиот претседател Никола Саркози, како и израелскиот премиер Бенјамин Нетанјаху и палестинскиот претседател Махмуд Абас.

Фотографијата на папата Бенедикт и египетскиот имам беше на Интернет страницата на „Бенетон“ цел ден, но е повлечена еден час по реакцијата во Ватикан и нема веќе да биде дел од рекламната кампања.