Мое ќоше

Тројно убиство во Гостивар

Ерол Ризаов

Најужасните пораки се: и јас би го направил истото, тоа е сердарот, новиот херој...

По двојното убиство во Гостивар се случи уште едно злосторство. Убиена е меѓусебната доверба. Убиен е гласот на разумот. Ширум се отворени вратите на нетрпеливост и ксенофобија. Социјалните мрежи на интернет експлодираа од реакции на поддршка на полицаецот со насилничко досие, кој уби двајца граѓани во банална расправија. Осудите на крвавиот чин и повикот на воздржаност, судска правда, присебност и толерантност се изгубија во лавината на милитантни пораки полни со навреди и јазик на омраза. Болните умови ги искористија можностите на информативните мрежи да ја испратат најужасната порака: Тоа е сердарот, новиот македонски херој, голем јунак и патриот, човекот што не го чувал кубурот за тешки времиња, веднаш да му се отвори жиро-сметка да се собира финансиска поддршка за неговото семејство. Прочитав голем број пораки со содржина од која се крева косата на глава: и јас би ги убил, жалам за загинатите, ама и јас би го направил истото, Тетово, Гостивар и Дебар се под албанска окупација... Претходниот ден на мирните протести на граѓаните Албанци во Гостивар медиумите јавија дека имало извикувања „смрт на Македонците“ и скршени излози на дуќани и продавници на Македонци.

Ете ова е грдата, мрачна страна од убавото лице на Македонија, која се гледа само кога крвта зоврива, но која загрижува до болка, од која секој разумен стравува за сопствената иднина и на своето семејство и на својата татковина. Кога сето ова ќе го видите и прочитате со свои очи, просто на човек му излетува од уста каква Европа, каква европеизација, какво НАТО. Длабоко сме потонати во балканштина, во шовинизмот и во тешка омраза.

Како и при сите вакви драматични и крајно чувствителни настани прва гине вистината. Првото официјално соопштение дека полицаецот пукал во воздух откако бил нападнат од четворица насилници пред очите на својата ќеркичка, нанесе огромна штета и предизвика огорченост во јавноста. Таа монструозна лага требаше да прикаже дека се работи за нужна самоодбрана на сопствениот живот и на животот на својата ќерка. Кој да му верува на второто соопштение дека немало никакво предупредување и пукање во воздух, дека загинатите не биле вооружени. Тоа што полицаецот бил конфликтна личност и двапати осудуван за насилство и тешка телесна повреда и загрозување на човечки живот со опасно орудие при тепачка тоа веќе никого не го интересираше. Во зовриениот котел тоа стана небитен факт.

Уште неколку работи се посебно загрижувачки. Мошне видлив и индикативен е односот на провладините медиуми. Таму нема јасна и недвосмислена осуда на крвавиот чин. Се објавуваат ексклузивно сведоштва на сопругата на полицаецот, небаре тој е жртвата, интонацијата е со видлива албанофобија и јазик на омраза, во подбуцнувачки стил и со ниски страсти. Од друга страна забележливо е отсуството на албанските реакции на социјалните мрежи. Тоа само го потврдува сознанието на еден албански аналитичар изнесено неодамна дека Албанците веќе не се информираат од македонските медиуми, дури ни од тие на албански јазик. Главниот извор на информирање на Албанците во Македонија е од медиумите во Албанија и во Косово. Тие се индиферентни на полемиките и настаните не само од политичкиот живот, секојдневјето, културата, спорот, туку и во шоу-бизнисот и забавата. Едноставно тие во македонските медиуми не препознаваат обраќање до нив и нивниот интерес и не им веруваат.

Единствена околност која дава искра надеж е дека, сепак, оваа наезда на интернет не е глас на мнозинството, туку на оркестрирана мобилизација на етничка и верска основа. Внимателното препрочитување на интернет- реакциите во врска со гостиварските настани покажува дека истите луѓе кои се јавуваат како адвокати на власта за секој текст кој е критички насочен кон власта и нејзините политики овојпат се главните пропагандисти и поддржувачи на сердарот и новиот македонски херој. Дури и изјавите на премиерот Груевски и на министерката Јанкулоска со осуда на убиството, иако и двајцата јавно кажаа дека станува збор за банална расправа, не можеше да го сопре стампедото предизвикано од првото лажно соопштение кое е типичен производ на ова време. Кога работите излегуваат од контрола се јавува бумеранг-ефект.