Децата се ранливи, грижете се за нив

Алармантно расте физичкото, психичкото и сексуалното насилство врз најмладите

Децата, како ранлива категорија на секое општество, имаат потреба од посебна грижа и помош од страна на возрасните. Потребно е да се почитуваат децата и нивната личност, нивните права, интереси и секогаш да се слушне детското мислење. Ова е пораката што ја упатија невладините организации по повод универзалниот Ден на детето, а кои се борат за детските права за да ги потсетат и да ги предупредат возрасните на обврските што ги имаат кон најмладата популација.

Првата Детска амбасада во светот „Меѓаши“, веќе десетта година заедно со уште 473 организации во 113 земји низ светот ги одбележува 19 Ноември – Светскиот ден за превенција од злоупотреба на децата и 20 Ноември – Светскиот ден на детето. Оттаму потсетуваат дека, за жал, секоја година расте бројот на случаи што се однесуваат на злоупотреба и насилство врз децата, а медиумите константно известуваат за се' подраматични случаи на физичко, психичко и сексуално злоупотребување на децата.

Минатата година на СОС-телефонот за деца и млади (0800 1 2222) се регистрирани зголемен број повици на деца, нивните родители и блиски членови на семејството, кои посочувале појава на секаков вид злоупотреба на децата. „Дури 48,3 отсто од пријавите се однесуваа на физичко, психичко, сексуално насилство врз децата, што е за 9 отсто повеќе споребено со 2008 година“, укажуваат во „Меѓаши“.

Испитувањата меѓу учениците, спроведени од страна на „Меѓаши“, покажуваат дека 41,6 отсто од децата биле тепани дома, а 57 отсто кажале дека познаваат други деца што биле удрени од страна на професор во училиште.

„Ова е алармантен проблем што бара поголемо внимание и заштита, како и превентивни мерки на семејно, национално и меѓународно ниво. Потребно е синхронизирано дејствување на сите релевантни институции, како и подобра соработка меѓу граѓанските организации и институциите на државата, со цел заштита на децата“, укажуваат во „Меѓаши“.

По повод Универзалниот ден на децата, претседателот на невладината „Цивил“, Џабир Дерала, апелира Владата да им одобри итни средства барем на 50 деца што имаат потреба од неодложни операции во земјава и во странство. „Со тоа ќе покажат вистинска грижа за нашите најмлади сограѓани. Ги повикуваме и сите хумани луѓе во оваа земја да донираат средства на деца за кои се во тек јавни апели за помош“, вели тој. (Д.Т.)