Хајдер бил пијан кога загинал

ВИЕНА - Екстремно десничарскиот австриски политичар Јерг Хајдер бил пијан кога се случила фаталната сообраќајна несреќа во саботата, изјави официјален претставник од неговата партија.

Штефан Пецнер, новиот лидер на Хајдеровата Алијанса за иднината на Австрија, изјави дека нивото на алкохол во крвта било многу повисоко од законски дозволеното. Хајдер (58) бил сам во автомобилот, откако во саботата го напуштил ноќниот клуб и кога неговиот автомобил неколку пати се преврте.

Полицијата соопшти дека тој се движел со брзина од 142 км/ч во зона каде што ограничувањето на брзината е 70км/ч. Несреќата се случи јужно од Клагенфурт, главниот град на Каринтија, каде што беше гувернер на провинцијата.

„Точно е дека Јерг Хајдер бил под влијание на алкохол во времето кога се случила несреќата. Можам и морам да го потврдам тоа“, изјави Пецнер. Тој уште додаде дека се огласил со оваа информација поради раширените гласишта дека Хајдер возел под дејство на алкохол. (Би-Би-Си)