Мое ќоше

Добри вести од Павел Шатев

Ерол Ризаов

Што ни приреди за Стара нова година Институтот за добри вести

Тамам се бев сериознo загрижил што го нема Институтот за добри вести „Павел Шатев“, кога оп, еве ги, се огласија, истражувачите од научната институција со големо и значајно име. Веднаш ми олесна кога видов какви спектакуларни откритија за расположението на нашите народи и народности ни приредија партиските научници спроти Стара нова година. Се намачиле луѓето да им телефонираат на илјада граѓани во празнично расположение, меѓу две сарми и голтка вино, да ги прашаат што мислат за нашата најважна работа, каква ни е власта, какви ни се партиите, колку ни е убаво на сите, кој е најубав и најсакан, каде одиме и како ќе живееме. Сега сум раат и сосема спокоен дека не' чека убава, бериќетна и просперитетна година. И што е најважно, ќе биде се' така додека не' предводи ВМРО-ДПМНЕ и најомилениот ни лидер, посакан од сите други заедно, нашиот драг водач Никола Груевски.

Замислете си колкаво е сензационалното откритие на истражувачкиот тим на „Павел Шатев“. Се' уште со највисок рејтинг меѓу сите политички партии е МВРО-ДПМНЕ, потоа има неколку празни места, па следуваат сите други. Кажано прецизно како што прилега за научен институт: на прашањето доколку утре се одржат парламентарни избори, за која партија би гласале, најголем дел од тие илјада души што ја имале среќата да бидат извлечени во лотаријата на „Павел Шатев“ 23,2 проценти одговориле дека би гласале за ВМРО-ДПМНЕ, 13,7 проценти за СДСМ, 7 за ДУИ, 4,2 за ДПА и 1,8 за НДП. Ова е тоа што треба добро да го запаметите. А што треба веднаш да заборавите и воопшто да не размислувате за тоа е глупавиот факт што вака се изјасниле само 49,9 од анкетираните. Што кажале повеќето од половината, односно 50,1 проценти. Ништо. Си молчеле луѓето. Ни збор за ова не кажале 33 отсто од луѓето доследни на најголемата безимена партија МОЛК. Само незначителни 15,5 проценти, дури од втората по големина партија дрско велат дека не би гласале ниту за една партија. Ми недостасуваат 1,6 проценти. За нив научниците ништо не кажуваат, дали тие пцуеле или нешто зборувале против власта не знам. Но, сигурно не биле патриоти. Безобразници и едните, и другите и третите.

Потоа следува прашањето на кој му е н��јголем рејтингот. И тука има неверојатно изненадување. Никола Груевски е прв со 23,5 проценти. Повеќе вреди човекот и од својата партија. Потоа е се' празно, па одвај негде таму далеку ја покажува главата Бранко Црвенковски со 8,2 отсто, веднаш до него е Али Ахмети со 7,1, па потоа доаѓаат Руфи Османи и Мендух Тачи со 2,5 и 2,3 проценти. Или кажано со јазикот на апологетските труби, Никола Груевски сам има 23,5 проценти, а сите други заедно 20,1 проценти. Ете, така ти е тоа кога народот те сака. Ова е факт за трајно врежување во мозокот. А што е за амнезија. За заборавање итно е тоа што мислат 56,4 отсто од испитаниците. Истражувачите на „Павел Шатев“ ни кажуваат дека 24,7 проценти кажале дека немаат доверба во ниту еден политичар. Ова се, пак, оние неранимајковци на кои човек никогаш не може да им угоди. Колку повеќе ги галиш, тие се полоши. А што е со цели 31,7 проценти. За нив нема јавни податоци. Најверојатно се распоредиле по некои маргиналци не препознавајќи кои се вистинските наши водачи.

Ми падна камен од срцето кога научниците од Институтот за рилакс соопштија авторитетно дека мнозинството граѓани сметаат оти Македонија се движи во добра насока. Цели 47,6 отсто велат дека добро газиме напред, а безначајни 36,2 сметаат дека сме го утнале патот и одиме во погрешен правец. Пак ми недостигаат 16,2 проценти. Овие изгледа или не знаат каде одиме или мислат дека одиме назад. Браво за тимот на „Павел Шатев“, така се прави истражување. Ами како.

И на крајот, најслаткото, шлагворт, што би рекле античките народи. Над половината од испитаниците, 51,1 процент, сметаат дека Владата успешно ќе се пресмета со најавената светска економска криза. Небитни 33,4 проценти не веруваат во тоа. Во ништо да не се верувало, бре. Пак ги нема нигде цели 15,5 отсто. Аман веќе со тие. Знам, изгледа тие се оние типчиња кои наивно мислат дека од ова не може да биде бетер. Може, може...

Тоа ќе го докаже независниот Институт „Димитрие Чуповск��“ исто толку самостоен колку и „Павел Шатев“. Ги очекувам набргу со непристрасни оценки за подобните и неподобни медиуми. Овој пат мислам дека нема да имаат многу работа. Речиси сите се подобни.