ЕВН: Укинувањето на евтината тарифа е економски оправдано

„Укинувањето на евтината струјна тарифа од 13 до 16 часот е економски оправдано и исправно, а одлуките на Регулаторната комисија за енергетика да се зголеми цената на електричната енергија и да се укине евтината дневна тарифа се економски оправдани и неопходни за функционирање на енергетскиот систем во земјава“, соопштија од ЕВН „Македонија“.

Со тоа ќе се стимулирало трошењето на електричната енергија во ноќните часови кога таа е најевтина, со што ќе се намалат трошоците за купување електричната енергија на пазарот од 13 до 16 часот, кога таа е најскапа.

ЕВН промената на тарифниот модел ќе ја спроведува етапно и во најбрз можен рок според расположивиот капацитет на компанијата.

„Никаде во регионот и пошироко нема дневна евтина тарифа, тоа е наследено од поранешна СФРЈ. Другите земји од некогашна СФРЈ тоа го укинаа пред многу години, а Македонија тоа го прави последна. Нема техничка, ниту економска логика во периодот кога оптоварувањето на енергетскиот систем е најголемо, да се стимулира потрошувачка која дополнително ќе го оптоварува системот и ќе предизвикува зголемени трошоци за увоз на струја во зимските месеци“, стои во соопштението.

Според ЕВН, средствата што ќе се соберат повторно ќе се вратат во стопанството, ќе се исплаќаат навреме обврските на добавувачите и ќе се реализираат инвестиции во мрежата, со што ќе се осигура стабилно и квалитетно снабдување со струја. (Ек.Р.)