Поглед

Денот кога се сади дрво

Билјана Ангеловска

Кој толку многу сака да сади дрва? Или, можеби некој многу повеќе сака да не работи! Дилемата се наметна деновиве откако во јавноста како пожар се прошири веста дека в среда е Ден на дрвото. Додуша, најпрвин во оптек беше минатата среда, но откако никој официјално не информираше за големата акција, луѓето сами си го префрлија еколошкиот ден за наредната седмица, односно денеска. Работата отиде дури дотаму што во училиштата наставниците и професорите „навреме“ ги информирале учениците дека во среда нема да се работи, бидејќи ќе садат дрва.

Но, Министерство за труд и социјална политика вчера ја уништи забавата. „Во врска со шпекулациите изнесени во јавноста за наводниот Ден на дрвото, Министерството информира дека среда е работен ден“, гласи кусото соопштение од таму, во кое зборот среда е напишан со големи, зацрнети букви. Значи, гласините стасале дури до надлежните и ги приморале да реагираат со официјално известување дека нема абер од прогласување неработен ден.

Сега, веројатно останаа еден куп разочарани луѓе! Најпрвин учениците, бидејќи денеска ќе мора да одат на училиште. Можеби и нивните родители, но и останати вработени граѓани. Иако сите знаат дека денот посветен на дрвото се одработува во некоја сабота, сепак, не беше лоша идејата да се садат дрва токму денеска. По неработниот понеделник, убаво ќе дојдеше и една неработна среда. Така полесно и побрзо ќе мине неделата. А, и времето деновиве е пријатно за излет во природа!

Но, не излезе есапот. Некому очигледно многу му се брзало, па сам одлучил да ја информира јавноста дека Денот на дрвото годинава ќе биде во октомври, притоа заборавајќи дека есенското садење дрва е во ноември.