Едиторијал

Паралелни светови во Владата

Александра М. Митевска

Али Ахмети, лидер на ДУИ и партнер во владејачката коалиција, фрли лопата на темелите на новиот плоштад во скопската населба Чаир што ќе го носи името „Скендер-бег“. Повеќето функционери на ДУИ, министри и пратеници, присуствуваа на помпезниот настан, со кој почнува одбележувањето на 100-годишнината од независноста на Албанија. Дојде и градоначалникот на Тирана, Љулзим Баша.

Но, го немаше скопскиот градоначалник, Коце Трајановски. Не дојдоа ниту премиерот Никола Груевски ниту министрите Македонци во Владата, која ја финансира првата фаза од долгонајавуваната изградба на плоштадот. Ги немаше ни опозициските партии, но нивното отсуство и онака беше очекувано.

Можеше да се очекува и дека „македонската постава“ на „Илинденска“ ќе го заобиколи настанот кој нејзиниот коалициски партнер од албанскиот камп го издигна на ниво на голема прослава. Сепак, имајќи ја предвид склоноста на актуелните функционери да фрлаат лопати и да сечат црвени ленти, некои можеби се понадеваа дека сопартијците на Груевски нема да ја пропуштат и оваа можност за фотографирање. Но, не испадна така...

Треба да се има разбирање за министрите и за пратениците кои го игнорираа стартот на изградбата на новиот плоштад во Чаир. Можеби се заморија или се заситија од толку прослави, поставувања камен-темелници и споменици, отворања нови објекти и пуштања во употреба на нови проекти - некои и по неколкупати. А плоштадот „Скендер-бег“ и онака не е дел од големиот проект „Скопје 2014“. Тој е само компензација за него - уште една отстапка за мир во владиниот двор, договорена во четири очи, без јавна расправа и без вклучување на експертската јавност и на другите политички фактори.

Спомениците и објектите што никнуваат последниве години на двата брега на Вардар, всушност, се верна слика и за владините политики и приоритети и за релациите меѓу коалициските партнери. На едната страна „Воинот на коњ“, а на другата Скенер-бег качен на коњ. На десниот брег печат за своето владеење ќе остави ВМРО-ДПМНЕ, а на левиот ДУИ. Секако, тоа што коњот го има и на двете страни е чиста случајност и нема никаква врска со политичката ориентација на ВМРО-ДПМНЕ кон десницата и на ДУИ кон левицата.

Затоа и не беше изненадување отсуството на вмровците во Чаир. Ахмети и неговите интегративци, исто така, ги немаше кога Груевски неодамна држеше говор и ја прогласи за отворена Порта “Македонија“, еден од објектите од „Скопје 2014“ што најмногу паѓаат в очи.

Со тоа уште еднаш се покажа дека два паралелни света функционираат на една улица во Скопје, на „Илинденска“, во една иста зграда, во „коцките“ крај Вардар. „Кохабитацијата“, веројатно, им се исплатува и, очигледно, добро им оди. Кога е во прашање желбата за освојување и задржување на власта, не е тешко да се откријат заеднички точки и меѓу најоддалечените паралели. Но, кога релациите во Владата ќе станат репер за соживотот и за релациите во општеството, тогаш би требало да се вклучи алармот.

Груевски и Ахмети можеби не можат да се најдат на иста линија за значењето на Александар за Македонците или за емоциите на Албанците кон Скендер-бег. И во не толку далечното минато можат да се најдат безброј работи што може да исцртаат нови линии на поделби меѓу нив двајцата. Доволно е да се вратат четири години назад...

Но, нивна заедничка обврска е да му оддадат почит на минатото, да се фокусираат на проблемите во сегашноста и со тоа да ја менаџираат иднината на државата. Токму за тоа добија легитимитет од своите гласачи.