19.07.2012, 14:51 Пироман од инает го запалил Патенино
Педесет и тригодишен жител на соседното Ранчинци, осомничен за пустошот во Светиниколско
Говедар од соседното село Ранчинци го запалил светиниколското село Патетино, кое изгоре речиси до темел. Го направил тоа од инает, бидејќи изгубил судски спор од жител на Патетино околу напасување говеда. Ова се резултатите од неколкудневната полициска истрага. Веднаш по пожарот, жителите на Патетино во изјава за „Утрински весник“ го посочија осомничениот пироман како подметнувач на пожарот, жалејќи се дека со години имаат мака со него. Против Стево Гаврилов (53) е поднесена кривична пријава за предизвикување општа опасност.
Од Министерството за внатрешни работи соопштуваат дека неколку селани од Патетино го забележале Гаврилов на местото од каде што се појавил пожарот.
„Неколку години наназад, тој постојано имал расправии со селаните околу пасишта и ниви за испаша на стоката, постојано им правел полски штети и се заканувал дека ќе го запали селото“, велат од полицијата. Според истрагата, Гаврилов изгубил судски спор откако неговите говеда го уништувале имотот на жител на Патетино.
„Тој од порано ни е познат како подметнувач на пожари и против него има неколку судски решенија за подметнувани пожари“, изјави Снежана Санева, портпаролка на штипската полиција.
Надлежните вршеа попис на направената штета и ветија дека ќе помогнат. Жителите на Патетино повторуваат дека немаат друг дом. (Г.А.)
|
