СДСМ и пиша на Светска банка за најновото задолжување на државата

Опозициската СДСМ денеска го претстави писмото што планира да го достави до Светската банка за нивниот став во однос на Предлог законот за ново задолжување на Македонија кај СБ во износ од 50 милиони евра, а за кој веќе поднесе над 100 амандмани.

Преку писмото опозициската партија ја известува Светска банка дека се спротивставува на начинот на кој се однесува Владата во однос на „брзината на задолжување, употребата на позајмените средства, севкупната неодржливост и недостатокот од транспарентност“.

- Нашиот став го темелиме на конкретни факти кои покажуваат дека земјата рапидно го зголемува јавниот долг и тоа јавниот долг кон странство за 89,6 проценти за само три и пол години, а долгот во земјата за 55 проценти за само десет месеци годинава, рече на прес-конференција потпретседателот на СДСМ Зоран Јовановски.

За СДСМ е неприфатлива намената на трошење на парите што се позајмени како „средства за сите буџетски потреби“, бидејќи, оценуваат, станале извор за потрошувачката на Владата за непродуктивни намени. Неприфатливи се достасаните, а неплатени обврски на Владата кон фирмите, долг кој две и пол години се криеше, а кој подоцна го посочи и ММФ, и кој сега се манифестира на најразлични начини, долгови на болниците, долгови кон превозниците на ученици, греење на училиштата со нафта од државните резерви, наведе Јовановски.

Загрижувачки е, смета СДСМ, и порастот на буџетскиот дефицит од 0,5 проценти од БДП во моментот на промена на власта до 3,5 проценти од БДП и пречекорување на критериумите на ЕУ годинава. Ззадолжувањата кај Светска банка, според Јовановски, многу потсетува на она што се случило со заемот од ММФ два месеца пред предвремените парламентарните избори во 2011 година.

ВМРО-ДПМНЕ: СДСМ спротивно на Деловникот го кочи носењето на Буџетот

Комисијата за финансирање и буџет од почетокот на амандманската расправа по предложениот буџет за наредната годима има поминато 80-тина од вкупно поднесените 1.026 амандмани. Доколку се продолжи со вакво темпо многу веројатно е дека предложениот буџет за наредната година нема да може да се донесе до крајот на оваа година, односно до 31 декември и во тој случај ќе треба да се оди на времено трошење.

Од вкупниот број амандмани 538 се од СДСМ и 460 од НДПМ, односно од пратеникот Изет Зеќири.

Од ВМРО-ДПМНЕ остро реагираат на постапките на лица избрани од Собранието да вршат функции, спротивно на правилата и Деловникот внесуваат хаос и ги закочуваат нормалните постапувања во парламентот.

- Да е ситуацијата попроблематична ние сме вознемирени поради тоа што внесувањето на хаос и попречувањето на нормалното работење на Собранието се случува на теми кој што се од висок интерес на граѓаните на Република Македонија, а се однесуваат на буџетското планирање, буџетското остварување за следната година и законите поврзани со ветувњето од Владата на Република Македонија за зголемување на пензиите и социјалната помош кој што граѓаните ќе ги добијат, рече Илија Димовски пратеник од ВМРО-ДПМНЕ.

Според него очигледно е дека СДСМ нема друг начин како да се спротистави на позитивните мерки што Владата на Република Македонија ги предлага во овој буџет, како зголемување на пензиите, зголемување на социјалната помош, зголемување на капиталните трансфери за изградба на патишта, болници, училишта, па одбра начин со внесување на хаос, со одовлекување и со свесно поставување на кочници од страна на двајца претседатели на Комисии во Собранието.

Тој потенцира дека тоа се прави спротивно на Деловникот и оти СДСМ со кочење и блокирање на нормалните процеси при планирањето на Буџетот има намера да се наметне во јавноста.