Аврамопулос предлага меморандум за договарање на рамката на преговорите

Целта на меморандумот е да се најдат заеднички точки со цел преговорите квалитатативно да помогнат за продолжување на преговорите

Од нашиот дописник
Миркица Поповиќ

Атина - Грчкиот министер за надворешни работи, Димитрис Аврамопулос предлага потпишување на меморандум за разбирање во кој се посочени рамката и основните параметри во кои се движат преговорите со цел побрзо постигнување на решение за спорот за името. Аврамопулос денеска го испратил писмото и меморандумот за разбирање до македонскиот шеф на дипломатијата Никола Попоски. Целта на меморандумот според писмото е да се најдат зае��нички точки со цел преговорите квалитатативно да помогнат за продолжување на преговорите.

Аврамопулос во предлог-меморандумот предлага двете страни да се договорат дека во решенито за името ќе има географска одредница и дека името ќе се користи ерга омнес, дека нема да има нарушување на територијалниот интегритет, одржување на границите односно потенцирање дека ниту една од двете држави нема територијални претензии кон другата, воздржување од пропаганда, изјави и активности со кои би се нарушиле преговорите вклучувајќи и користење на симболите кои се дел од културното и историското наследство. Точките од Меморандумот се договарање да се потврди постоечката граница како постојана и неповредлива меѓународна граница, подготвеност да се почитува суверенитетот, територијалниот интегритет и политичката независнот на другата страна и одлука да нема закана или користење на сила кон другиот, вклучително и закана и користење на сила со цел прекршување на границите. „Потврдуваме дека никој од нас нема да тврди или да поддржува барање за дел од територија на другата страна или барања за промена на нашата постоечка граница“, се вели во дел од предлозите.

Покрај територијалниот дел, една од точките вклучува договор да се интензивираат преговорите под капа на генералниот секретар на Обединетите нации според Резолуцијата на ОН 845 со цел да се постигне решение на разликите објаснети во резулуцијата 817. Имајќи ја предвид оваа цел, Аврамопулос во меморандумот предлага двете страни да се договорат дека е неопходно целосно да се почитуваат принципите на добрососедски односи и да нема мешање во внатрешните работи на другата страна во никаков случај, вклучувајќи и барање за територија која не е во постоечките граници на двете држави. „Ќе продолжиме да забрануваме непријателски активности или пропаганда од државни агенции и нема да охрабруваме слични активности од приватни лица кои може да поттикнат насилство, омраза или непријателство против другата страна, и ќе се воздржиме од активности или изјави со кои се ризикува да се нарушат преговорите, вклучувајќи и користење на симболи кои се дел од историското или културното наследство на другата страна“, се вели во меморандумот.

Последната точка се однесува на параметрите за конечната форма на името на нашата држава кое се преговара со цел да се даде нов стимул во преговориите. „Неопходно е да се продолжи врз основа на договорена рамка на основните параметри за решение на името, во кои ќе биде вклучен и договор дека било кој предлог треба да има јасна и дефинитивна одредница за името, која нема да остави простор за нејаснотии за разграничувањето на територијата на Поранешната југословенска Република Македонија од регионите на соседните држави, особено регионот Македонија во северна Грција, и дека името договорено ќе има севкупна употреба ерга омнес“.

Во писмото до Попоски, грчкиот шеф на дипломатијата му посочува дека ги има на располагање и шефицата на грчката канцеларија за врски, грчкото министерство за надворешни и преговарачот Адамантиос Василакис со цел да се продолжи и напредне оваа иницијатива.