Груевски: Жалењето на Бесими за Слупчане во позитивна насока

Чинот во Слупчане беше една приватна екскурзија на министерот за одбрана Фатмир Бесими или негова партиска задача, а денеска изразеното жалење во однос на тој настан е можност за смирување на ситуацијата, оцени премиерот Никола Груевски.

- Тој ниту побарал ниту ќе добиеше согласност за тоа од Владата за тоа да биде некакво владино чествување или негово испраќање на тоа место. Уште полошо е тоа што отиде со униформирани лица и на тој начин ги повреди чувствата на Македонците. Слушнав дека тој денеска изразил жалење за тој настан. Тоа е добро што изразил жалење и што сфатил дека тоа не е визионерска работа, ниту храбро лидерство, туку дека ги влошува меѓуетничките односи и создава една конфликтност и тензија, односно фрустрација кај голем дел од населението и дека на таков начин не може да се постигне помирување како што тој замислувал, рече Груевски.

Тој додаде дека по настанот во Слупчане го повикал Бесими и во разговорот министерот му образложил оти со таквиот чин сакал да се постигне помирување односно со тоа имал позитивни намери.

- Очигледно е дека дури и ако била таква намерата таа била лошо осмислена од него или од кој било друг. Во секој случај, се работи за еден лош чекор што беше направен, чекор кој ниту бил дел од нашите поранешни разговори кога создававме коалиција и чекор кој непријатно изненади многу луѓе и ги повреди чувствата на многу Македонци. Денешното негово жалење навистина може да е еден добар чекор што може да води кон една смирувачка ситуација, истакна премиерот Никола Груевски.