04.10.2012, 15:37 Бесими ќе отсуствува на гласањето за доверба
Министерот за одбрана, кој беше главен актер во судирот во коалицијата, отпатува во САД
Министерот за одбрана Фатмир Бесими, еден од главните актери во судирот меѓу ДУИ и ВМРО-ДПМНЕ, ќе ја пропушти разврската на владината криза. Тој нема да биде присутен на утрешната собраниска седница, на која ќе се гласа за иницијативата за недоверба на Владата, што ја поднесе опозицијата, како реакција на несогласувањата меѓу партнерите на „Илинденска“.
Бесими ја почнува денеска работната посета на САД, каде што ќе престојува до 14 октомври. Од Министерството за одбрана соопштија дека целта на оваа посета е унапредување на соработката меѓу Македонија и САД во областа на одбраната. Нема информација кога е договорена оваа американска турнеја на Бесими.
Од МО велат дека за време на престојот во САД, македонскиот министер за одбрана ќе оствари повеќе значајни средби и ќе одржи предавања на некои од најпрестижните американски универзитети, како „Харвард“ и „Џон Хопкинс“. Во Вашингтон тој ќе има средби во Пентагон и во Националниот совет за безбедност на Белата куќа.
„Успешниот модел на Македонија како мултиетничка функционална демократија, кој е пример за регионот и за современа Европа, е придобивка која ќе биде посочена на средбите на министерот во текот на посетата на САД“, соопштија, меѓу другото, од Министерството за одбрана.
Неколкумина министри на ДУИ, меѓу кои и Бесими, на 13 август годинава годинава, се поклонија пред споменик на ОНА во Слупчане, во придружба на неколкумина униформирани лица. Од тој чин, што Бесими го нарече обид за помирување, почна кавгата во Владата, која, во меѓувреме, се префрли и на теренот на меѓуетничките односи, навлегувајќи и во сферата на образованието и функционирањето на институциите. Меѓутоа, во изминатиот период, не беше иницирана политичка одговорност од Бесими поради тоа што ги однесе војниците во Слупчане. (А.М.М.)
|
