19.10.2012, 15:29 Без домашна кошарка и овој викенд
Продолжува агонијата во Првата лига, стартот повторно одложен
Дополнителното одложување на стартот на Првата лига не промени ништо кај спорните клубови. Вардар и Лирија се двете екипи поради кои Здружението на прволигаши мораше да го одложи првенството за уште една седница. Првите луѓе на двата клуба се уште немаат приложено документи дека почнале со трансформација во Акционерски друштва, а и тешко дека ќе ги спроведат барањата на Агнецијата за млади и спорт.
Кога станува збор за Вардар, ситуацијата е повеќе од јасна - не само што чекаат одговор на жалбата до Уставниот суд, туку воопшто нема да ја започнат трансформацијата. Ваквиот став го знае целата јавност, но не и МКФ каде се уште си гаат надежи дека „вардарци“ ќе ја сменат својата одлука.
Зачудувачки е што и Лирија не ја започнала трансформацијата и покрај тоа што најавуваше дека е во процедура. Најавите на челниците на клубот дека имаат спор со МКФ поради регистрација на одредени кошаркари се чини не била единствената причина поради која открија дека може да настапуваат во косовската лига.
И додека македонската „куќа на кошарката“ дозволува секој да си тера по свое, доаѓа период во кој одложувањето не му одговара на никому и почнува да создава проблем во предвидениот календар за новата сезона каде ќе треба да се уфрлаат неколку среди што прави проблем бидејќи Куманово и Кожув среде недела играат мечеви од БИБЛ.
Во ваква ситуација наједноставното решение е да им се дозволи на непослушниците да играат без направената трансформација, но во тој случај без дозвола на АМС ќе следи затворска казна за првиот човек на федерацијата, Даниел Димевски. Дали во Македонија ќе се игра клупска кошарка одговорот го има само АМС од каде засега молчат. (М.К.)
|
