16.10.2012, 14:13 Фетел не размислува за Ферари
Возачот на Ред бул ја демантира информацијата од Би-Би-Си дека размислува да си замине до 2014 година да стане возач на Ферари, каде што тимски колега би му бил Фернандо Алонсо
Себастијан Фетел ја демантира информацијата од Би-Би-Си дека размислува да си замине од Ред бул и до 2014 година да стане возач на Ферари, каде што тимски колега би му бил Фернандо Алонсо. Британскиот радиодифузер се повика на извор од италијанскиот тим, според кој трансферот на Германецот ќе зависи од тоа како ќе помине Ферари во следната сезона, која е последна од договорот со Фелипе Маса.
„Прво, во овој момент размислувам само за ��дна работа, а тоа е како повторно да станам светски првак. Навистина не размислувам да го напуштам Ред бул. Во таа екипа го имам сето тоа за што сум сонувал. Станав дел од едно големо и, што е најважно, успешно семејство. Немам причина, мотив ниту желба за заминување“, изјави новиот лидер во вкупниот поредок сезонава по триумфот во трката за Големата награда на Јужна Кореја во неделата. Четири трки до крајот на годинашниот шампионат тој има шест бода предност во однос на второпласираниот Алонсо.
|
