Иванов: Нашиот тим се вика Република Македонија



Македонскиот претседател на меѓународната конференција „Спортот како фактор за толеранција, заедништво и почитување“, која се одржа во Скопје

ФОТО: Киро Попов

„Спортот нема споредна, туку исклучително важна улога во општеството, бидејќи зближува, поврзува и гради заедништво“, истакна претседателот Ѓорѓе Иванов на меѓународната конференција „Спортот како фактор за толеранција, заедништво и почитување“, која се одржа во Скопје. Според шефот на државата, преку спортот може да се изгради солидарност, а неговата моќ е да ги поврзе луѓето во сила што ги сплотува клубовите, шампионите и нивните навивачи.

Во однос на мултиетничкиот спорт, пак, Иванов истакна дека во преден план секогаш е тимската работа.

„Мултиетничкиот спорт е токму тоа - тимска работа и на домашен терен и надвор на првенствата. И тоа не само во спортот, туку во секоја сфера на животот. Нашиот тим се вика Република Македонија, со сите нејзини граѓани и со сите нејзини заедници, независно од полот и возраста. Со мултиетничкиот спорт ќе ја осовремениме вековната традиција на толеранција, заедништво и меѓусебно почитување“, вели Иванов за кого само ваквите проекти се вистинскиот начин преку кој може да им се даде насока и пример на младите генерации.

„Одбележување на спортски ден во Република Македонија“ е идниот проект што го најави Иванов. Со воведување на спортскиот ден секој граѓанин еднаш во годината ќе одвои време за дружење токму преку спортот.

На Меѓународната конференција „Спортот како фактор за толеранција, заедништво и почитување“ за чија организација беше задолжен претседателот на Геостратешкиот институт „Глобал“, Иван Анастасовски, се обрати и американскиот амбасадор Пол Волерс.

„За децата од сите возрасти спортот е еден од најефикасните и најзабавните начини на градење мостови на заемно почитување и толеранција. Ова се лекции што можат да ги употребат во текот на нивниот живот“, истакна Волтерс, кој посочи дека последниот фудбалски натпревар меѓу Македонија и Србија е одличен пример дека кога се игра за националниот тим, без оглед на културното или етничкото потекло на играчите, треба да се знае дека сите играат за истиот тим и дека само на тој начин се победува.

Вчерашната меѓународната конференција е завршна активност на проектот „Спортот како фактор за толеранција, заедништво и почитување“, чиј покровител е претседателот Иванов, а кој изминатава година се спроведе во повеќе општини во Македонија. (М.К.)