(ВИДЕО) Срѓан Керим за претседавањето на Јеремиќ во ОН



„Неговата задача е да ги води земјите членки, да ја одредува агендата и да ги координира сите активности за ОН да функционираат во склад со своето име", истакна Керим

Во Њујорк почна 67. седница на Генералното собрание на Обединетите нации. На местото претседател е поставен поранешниот министер за надворешни работи на Србија, Вук Јеремиќ.

Д-р Срѓан Керим, некогашниот претседател на Генералното собрание на Обединетите нации од септември 2007. до септември 2008. година, за „Ал Џазира Балкан" изјави дека ингеренциите на претседателот на ГС се регулирани со повелбата на ОН и тоа зборува дека се работи за првата и највисоката функција во системот, и поради тоа трае само една година. Во спротивно, власта би била концентрирана во рацете на едно лице. Функцијата на претседателот на Генералното собрание е самостојна функција, тој не е делегат само на својата земја, туку е избран како претседател на Генералното собрание на сите земји. Неговата задача е да ги води, да ја одредува агендата во едногодишниот мандат и да ги координира сите активности на таков начин што Обединетите нации функционираат во склад со своето име, истакна Керим.

"За Србија како држава, тоа е добра можност да ја афирмира својата меѓународна позиција", смета Керим. "За регионот, бевме потрошувачи на услугите од најлош вид на ОН, сините шлемови беа стационирани во БиХ, Хрватска, Србија, Косово и во Македонија, а сега ја надминавме таа состојба и станавме продуценти на мирот и стабилноста во ОН, со самото тоа што преставник од регионот доби шанса да го води Генералното собрание", оцени Керим.

Керим смета дека не треба да се шпекулира дека Русија може да има позначајно влијание на претседавањето на Јеремиќ, со оглед на тоа што ја поддржа неговата кандидатура.

"Во Советот за безбедност одговорноста е поделена помеѓу постојани членки, САД, Франција, Велика Британија, Кина и Русија, а претседателот на Генералното собрание мора да води сметка ГС и Советот за безбедност добро да соработуваат и тоа од месец во месец. Јеремиќ ќе има прилика секој месец да разговара со актуелниот претседател на Советот за безбедност, кој на оваа позиција месечно се ротира. Со оглед на овој факт, нема смисол да се споменува посебната улога на Русија", вели Керим во интервјуто за „Ал Џазира Балкан“.