Се буди вулканот на Санторини?



Атина - Грчкиот остров Санторини, еден од најпопуларните туристички дестинации, предизвикува загриженост во научни кругови поради зголемена вулканска активност. Количеството магма на островот се зголемило за 10-20 милиони кубни метри за само 15 месеци во периодот од јануари 2011 до март 2012 година. Истражувањето на професори од престижниот Оксфорд и Атинскиот универзитет ги потврдија шпекулациите кои подолго време се слушаат во Грција за зголемување на вуланската активност и насобирање големо количество магма кое се смета за еднакво на 10-20 години активност на островскиот вулкан. Просторот што го зафаќа магмата се проценува дека е 15 пати поголем од Лондонскиот олимписки стадион. Научниот тим што ја следи активноста предупредил дека ако вулканот продолжи со иста ваква активност и во следните години, магмата ќе достигне исто количество како и при последните две големи ерупции на вулканот. Професорот на Универзитетот во Џорџија, Ендру Њуман, уште во март годинава предупреди на зголемена вулканска активност на познатиот остров.

Монденскиот Санторини е создаден од вулканска ерупција пред 3.600 години. Сегашната активност се смета за најзначајна од ерупциите на островот во периодот од 1939 и 1950 година, кога биле последните две значајни вулкански ерупции на Санторини. Во дел од научните кругови каде што се испитува активноста на вулканот има подрастични предупредувања дека не е исклучена ерупција, додека, пак, други се обидуваат да ја смират топката и коментираат дека зголемената магма е само потсетување да не се заборави дека на островот има вулкан. Со цел да се смири јавноста, професорите кои го набљудуваат вулканот смируваат дека постојано и секојдневно се следат будно активностите на Санторини, така што не би дозволиле да бидат изненадени од ерупција. Научниот тим дава можност од 10 до 50 отсто за ерупција на вулканот доколку продолжи активноста со ист интензитет како досега. Весникот „Етнос“ пренесува дека според грчките научници од април досега активноста полека спласнува, што се смета утешително и ја зголемува надежта за смирување на вулканот. Тие потенцираат дека ако во јануари биле забележани околу 120 земјотреси на островот поголеми од 0,5 степени според Рихтеровата скала, бројот на земјотреси значително се намалил во февруари на 25 земјотреси и 15 во март. Според тимот што го следи вулканот, од април досега месечно има само од два до четири земјотреси на островот.

Шпекулации за активноста на вулканот на Санторини се ширеа во грчката јавност веќе неколку месеци. Грчките и светските медиуми пренесуваат дека во последната година на островот биле забележани чудни потреси и гасови, кои сега се објаснуваат со покачување на количеството магма во вулканот. (М.П.)