Штрајк на лекарите, сепак, ќе има

Без разлика на тоа каква ќе биде утрешната одлука на Судот, докторите не се откажуваат од намерата да штрајкуваат поради одлуката на Министерството за добивање плата по успешност.

„Ќе ја почитуваме одлуката што ќе ја донесе Судот, но тоа не значи дека нема да донесеме одлука за нов штрајк, доколку за нашите барања не успееме да се договориме со Министерството за здравство“, изјави денеска д-р Дејан Ставриќ, претседател на Самостојниот синдикат на клинички центри, по денешното судско рочиште меѓу Министерството за здравство и синдикатот на Клинички. Тој додаде дека се надева оти деновиве ќе продолжат преговорите со Министерството за наоѓање заеднички став околу моделот на исплата на плата по успешност.

Според адвокатот на Синдикатот на Клинички, Тодор Петровски, ќе се чека одлуката на Судот и доколку таа биде во корист на лекарите, нема да се поднесе жалба.

„Но, доколку биде донесена привремена мерка за забрана на штрајкот, ќе се жалиме до Апелацискиот суд“, нагласи Петровски. (М.Т.)