20.10.2012, 17:47 Наместо помош од надвор, да се поттикнуваат сопствените бизниси
ОХРИД - Поттикнување на сопствени бизниси наместо барање помош од надвор. Ова е рецептот за стимулирање на економскиот развој кој го образложи основачот на втората по големина компанија за вода во шишиња во САД, „Нијагара Ботлинг“, Енди Пејкоф, кој по потекло е од егејскиот дел на Македонија. Зборувајќи на панелот посветен на ангажирањето на дијаспората за создавање на економски можности на вториот ден на Глобалниот инвестициски самит Пејкоф додаде дека Македонија има многу области каде што може економски да напредува, како и бројни производи кои може да ги пласира во светот,меѓу кои ги издвои виното, сирењето, јагнешкото месо, но и водата за пиење.
„Потребна е промена на начинот на размислување, од социјалистичко водење бизнис кон она што е карактеристично во САД, каде што се користат сопствени пари за развивање на сопствените бизниси“, рече Пејкоф.
Д-р Антонио Петров од Универзитетот Тексас во Сан Антониот, САД истакна дека Македонија треба да ги искористи предностите кои што и ги овозможува нејзината географска положба, бидејќи се наоѓа на средина меѓу истокот, западот, северот и југот. Д-р Петров, кој за себе рече дека е горд Македонец, смета дека за поголем економски развој е потребна квалификувана работна сила, при што препорача меѓу другото соодветна програма за стипендирање на квалитени кадри.
„Ова е самит на големи очекувањеа и високи очекувања“, рече македонскиот амбасадор во Финска и во Шведска Кире Илиевски според кого треба да се искористат искуствата од овие земји за интензивирање на врските на дијаспората со матичната земја. Тој нагласи дека повеќе Македонци се наоѓаат на високи позиции во големи компании, како што се СААБ, Волво.
Роберт Вуртс, директор на Мисијата на УСАИД во Македонија рече дека македонската дијаспора со дознаките кои што ги испраќа во земјава (над 400 милиони долари) значително придонесува за економијата, како и дека нивната улога во нашата земја не била толку насочена кон инвестиции туку повеќе кон помош за хармонизирање на законодавството и за намалување на административните процедури кои помогнале да се привлечат инвестиции. (М.Ј.)
|
