Нови гафови и шеги во американските избори

Барак Обама и Мит Ромни се обратија на свечена вечера во Њујорк, каде имаа ретка можност да прават шеги на меѓусебна сметка.

Присуството на двајцата кандидати на меморијалната вечера во чест на првиот католички претседателски кандидат Алфред Смит е своевидна традиција во американската политика. Прв зборуваше Ромни, кој се шегуваше на сметка на притисокот на претседателот Обама врз Католичката црква, гафовите и смеењето на потпретседателот Бајден за време на потпретседателската дебата и ги обвини медиумите дека го поддржуваат Обама.

- Не сакам да кажам дека медиумите се пристрасни против мене. Сфаќам д��ка и тие и јас имаме задача која треба да ја сработиме. Мојата задача е да понудам позитивна визија за иднината на оваа земја, а нивна задача е да се погрижат никој жив да не дознае за тоа. Веќе знам какви наслови ќе извадат за оваа вечера. Ќе кажат, претседателот Обама доби поддршка од католиците, а Ромни беше на вечера со богаташи како него, рече Ромни.

Претседателот Обама се шегуваше за богатството на Ромни за кого кажа дека дошол во Њујорк на шопинг, да купи неколку продавници, но се шегуваше и на своја сметка, за лошиот настап во првата дебата против Ромни.

- Ова е моја трета средба со гувернерот Ромни во кратко време. Забележавте, имав многу повеќе енергија во нашата втора дебата. Бев навистина добро одморен, откако ја преспав првата, изјави Обама.

Католичките гласачи на кои им се обратија двајцата кандидати се еднакво поделени меѓу републиканската и демократската партија, а оваа година двајцата потпретседателски кандидати се католици.

Обама беше соочен со силни критики на католичките свештеници поради здравствените реформи, со кои на католичките институции им се наложува при обезбедувањето на здравствената заштита за своите вработени да вклучат и контрацептивни средства, па дури и абортус, нешто што се противи на статутите на многу католички образовни, здравствени и хуманитарни организации.

Ромни повеќе пати го осуди Обама за овој чекор, и ја повика Католичката црква да се бори за животот на секое неродено дете.

Во меѓувреме, голем број анкети ја анализираат состојбата на трката, во пресрет на последната, трета дебата која е предвидена за понеделник.

Анкетата на Галуп, која предизвика најмногу реакции вчера, покажа дека Ромни води пред Обама со дури седум проценти разлика, 52 наспроти 45 проценти.

Друга анкета спроведена во влијателната сојузна држава Пенсилванија покажа неочекувано водство на Ромни, кој досега не направи сериозни обиди да го предизвика водството на Обама во оваа држава.

Агенцијата Паблик полиси полинг покажа дека двајцата кандидати се изедначени, со по 48 проценти од гласовите, додека Обама ја задржува предноста во Колорадо, една од клучните сојузни држави за кои се борат двајцата кандидати.

Вчерашниот ден беше одбележан со нови гафови на потпретседателот Бајден, кој на собир во Лас Вегас двапати ја прашал публиката дали лично познаваат војници кои биле ранети во Ирак и во Иран. Потпретседателот мислел на Ирак и Авганистан.

Кампањата на Обама продолжува да го напаѓа Ромни за изјавата на дебатата во вторникот, кога кажа дека како гувернер на Масачусетс барал од советниците да му донесат квалификувани женски кандидати за високи функции, и тие му донеле ‘папки полни со жени’. Според Обама, Ромни со оваа изјава ги навредил женските гласачи.

Од друга страна, кампањата на Ромни возвраќа по настапот на Обама на хумористичната емисија на Џон Стујарт. Емисијата се` уште не е објавена, но во јавноста излезе инфорамција дека, прашан за нападот врз амбасадата на Бенгази и убиството на амбасадорот Кристофер Стивенс и уште тројца Американци, Обама рекол дека тоа ‘не било оптимален настан’. Со оваа изјава на Обама, нападот во Бенгази останува главна тема во медиумите меѓу двете дебати. (МИА)