20.10.2012, 12:17 Оставка на британскиот министер Ендрју Мичел поради навреда на полицаец
Членот на британската влада Ендрју Мичел синоќа поднесе оставка, откако неколку недели беше под силен притисок од медиумите и опозицијата да се повлече од владата, по неговата расправија со еден од полицајците, кои се грижат за безбедноста во лондонскиот Даунинг стрит.
За одлуката да поднесе оставка, Мичел лично го известил премиерот Дејвид Камерон, во неговата резиденција во Чекерс. Портпаролот на владата соопшти дека Камерон ја прифатил оставката. За негов наследник во владата е именуван Џорџ Јанг, кој до неодамна беше лидер на ториевците во Долниот дом на Парламентот, јави дописникотм на МИА од Лондон.
Мичел се најде на удар во домашната политичка јавност, откако минатиот месец се скара со дежурниот полицаец на влезната врата во Даунинг стрит. Полицаецот го одбил барањето на министерот да му ја отвори големата врата за да излезе по седницата во владиниот кабинет, со својот велосипед, објаснувајќи му на Мичел дека според безбедносните прописи, вратата се отвора само за влегување и излегување на возила.
Налутениот министер тогаш почнал да го навредува полицаецот, нарекувајќи го „морон“ и обичен „плебс“.
Мичел подоцна јавно се извини за инцидентот, а потоа му се извини и на полицаецот за „погрешно употребените зборови“, но медиумите и опозицијата на кои им пречеше „ароганцијата“ на министерот и неговото понижување на полицаецот, бараа тој да си замине од владиниот состав. Синдикатот на полицајците исто така побара од Мичел да поднесе оставка или да биде сменет од премиерот Камерон.
Влезот во „мртвата“ Даунинг стрит, во која се наоѓаат само кабинетот на британскиот премиер и неговата резиденција, во куќата со број 10, како и резиденцијата и кабинетот на министерот за финансии во куќата со број 11, е затворен со голема, железна, влезна врата, пред која секогаш има вооружени полицајци. Ваквата мерка е донесена од безбедносни причини пред повеќе децении, по серијата терористички напади на ИРА.
|
