10.07.2012, 14:10 Тревога за топлотен бран во 10 града
Министерството за труд и социјала на 25 фирми им изрече забрани за работа на отворено, бидејќи не ги почитувале препораките
Здравствените власти од денеска вклучија тревога за топлотен бран за 10 града во државата. Топлотниот аларм кој ќе трае и утре и задутре, е вклучен за Скопје, Куманово, Свети Николе, Велес, Штип, Струмица, Радовиш, Кавадарци, Демир Капија и Гевгелија, кои се зафатени со топлотниот бран. Ова значи дека во овие градови ќе има дневни температури кои се невообичаени за јули. Министерот за здравство Никола Тодоров им порача на работодавците од овие градови, деновиве да ги ослободат од работни обврски бремените жени и лицата постари од 60 години, но и да го реорганизираат работното време за градежните работници кои работат на отворено во период од 11 до 16 часот. Во овој период од денот, и на градинките им се советува да не ги изнесуваат децата на отворено. За полесно справување со горештините, Министерството за здравство заедно со лекарите од Здравствен дом „Скопје“ од 18,30 до 21,30 часот отворија превентивни едукативни здравствени пунктови, и тоа во Скопје, Штип, Кочани, Струмица, Неготино, Велес. За останатите градови во земјава и натаму важат општите препораки.
За работа на отворено на плус 40 Целзиусови степени, денеска се изречени и првите казни за газдите.
Министерството за труд и социјална политика на 25 фирми им изрече решенија за забрана за работа на отворено, бидејќи и покрај препораките од државата, работниците ги терале да работат во критичниот период од денот од 11 до 17 часот. Најголем дел се, пред се', градежни фирми кои биле ангажирани од скопските општини. Поради забраните, стопирани се градежните работи на новиот објект на „Водовод и канализација“, потоа на кружниот тек во „Ѓорче Петров“, фирмите кои работат на уредување на булеварот „Климент Охридски“, на изградба на катните гаражи на булеварот „Крсте Мисирков“ и кај Цветниот пазар. Кои се фирмите, министерот за труд и социјална политика Спиро Ристовски не сакаше јавно да ги обелодени. Но, тој најави дека ако не се почитуваат забраните, ќе следуваат поголеми санкции и казни.
„Моментно во надворешни услови нема елементарни услови за работа во период од 11 до 17 часот и ќе продолжиме да го спроведуваме законот без разлика кој е работодавецот и на каков проект се работи“, потенцира Ристовски.
Тој лично контактирал со градоначалници на неколку скопски општини каде што се реализираат проекти на отворено и добил поддршка за забраните. Некои од нив веќе и самите им сугерирале на компаниите да ја намалат активност во периодот од 11 до 17 часот. „Бидејќи неколку пати е јавно кажано, од денеска нема да ги криеме субјектите кои ќе извршуваат работни задачи во тој период“, нагласи Ристовски.
Забраните уследија под притисок на јавноста дека ресорното министерство само дава препораки, а ги остави работниците на милост и немилост на газдите. Работниците беа принудени да работат на отворено, иако надворешните температури се искачуваат и до 40 Целзиусови степени. Од Министерството за труд и социјална политика се правдаат дека пред десетина дена прво настапиле со препораките до работодавците за да ги заштитат работниците кои работат на отворено, но откако инспекциите согледале дека не се почитуваат, се решиле да изрекуваат забрани за работа.
Инаку, и при претходниот топлотен бран препораките за заштита на работниците од високите температури не се почитуваа, но тогаш немаше забрани за фирмите. Останува нејасно, зошто дури сега министерството настапи со предупредување до несовесните газди.
И нашата снимка на теренот по Скопје, исто така, покажа дека градежните фирми ги олабавија своите активности. Веројатно заканата на ресорното министерство вроди со плод, па фирмите се исплашија. Најочигледно беше на зградата на парламентот каде што околу 12 часот немаше ниту еден работник кој работи на фасадата, иако претходниот ден на големо се работеше. (Ј.Ј.)
|
