Дискретната двојка стапи во брак

Бившата министерка за култура, Ганка Самоиловска, и директорот на Клиниката за кардиологија, Сашко Кедев, и официјално станаа сопружници

Валентина Тодоровска

Една од најдискретните двојки кај нас, бившата министерка за култура, Ганка Самоиловска, и актуелниот директор на Клиниката за кардиологија, Сашко Кедев, се решија да ја официјализираат својата врска. Сосема тивко и без голема помпа, тие двајца почнаа да го бројат брачниот стаж.

Нивен познајник, кој инсистира на анонимност, вели дека зад оваа двојка стојат години на преиспитувања, надмоќно владеење над сите законски ливчиња за на крај успешено да изманеврираат над средината и официјално да станат сопружници. Одвреме-навреме Сашко и Ганка се појавуваат заедно, обидувајќи се приказната да ја зачуваат само за себе иако и на двајцата ова им е втор брак - Ганка има една ќерка, а Сашко две ќерки.

Што се однесува до професијата, оваа двојка има завидни биографии - Ганка (43) е магистер, работела како доцент на Факултетот за музичка уметност. Во биографијата е наведено и функција директор на Македонската филхармонија. Во времето на премиерувањето на Љупчо Георгиевски беше министерка за култура. Музиката и политиката можеби немаат никаква врска, но успешноста во една, многу лесно може да ве искачи на тронот, на другата професија.

„Прилично доцна се вклучив во светот на политиката, вели Ганка во едно интервју. Пресвртница во мојот професионален живот беше понудата да станам директорка на Македонската филхармонија, иако дотогаш бев доцент на Факултетот за музичка уметност. Ми беше понудено да раководам со една сериозна национална институција која во тој момент се соочуваше со многу тешкотии. Тоа се случи во 1999 година кога имав 31 година. Од една општествена функција, директно станав министер за култура“.

Сашко Кедев во својата лична карта ја има заведено 1962 како година на раѓање, а Штип, каде што завршил и средно образование, како негов роден град. Во Скопје е од времето на студиите на Медицински факултет, по што има импресивна кариера на кардиолог, доктор на медицински науки и доцент на Медицинскиот факултет. Бил директор на Клиниката за кардиологија од 1999 до 2003 година а претходно, две години, од 1991 до 1993 година престојувал во САД, на специјализација во клиниката во Бетезда, од каде што се враќа со лиценца за работа во САД. Има едногодишна специјализација и од клиниката во Бергамо, Италија, и повеќе куси стручни престои во земјите на ЕУ.

Во 2006 година Ганка е претседателка на Изборниот штаб на претседателскиот кандидат на ВМРО-ДПМНЕ, Сашко Кедев, и оттогаш започнува нивното дружење. Во тој период двајцата беа во брак.