23.07.2012, 16:45 Бомбашот самоубиец од Бургас имал сопатничка
Бомбашот-самоубиец, кој е одговорен за минатонеделниот напад врз автобус со израелски турсти во бугарскиот град Бургас, пристигнал од соседна Романија, пристојно говорел руски јазик и имал сопатничка, јавуваат денеска бугарските медиуми.
Според иследниците кои ја водат истрагата на нападот, во кој загинаа бомбашот-самоубиец, петмина израелски туристи и бугарскиот возач, напаѓачот најмалку еден ден пред нападот престојувал во еден хотел во Варна, во кој зад себе оставил „биолошки докази“.
Полицијата трага по жена, за која се верува дека престојувала со него во хотелот „Перфект“ во Варна и се претпоставува дека таа можеби е поврзана со друг маж, за кого полицијата смета дека е соучесник во нападот, пишува бугарскиот весник „Труд“, цитирајќи анонимни извори.
Весникот ја пренесува изјавата на еден таксист, кој вели дека го возел бомбашот-самоубиец од Равда до Поморје, две гратчиња северно од Бургас, еден ден пред нападот. Тој изјави дека напаѓачот пристојно говорел руски јазик.
Бугарските власти не изнесуваат детали во врска со истрага, туку само наведоа дека веруваат оти бомбашот имал околу 36 години, лажна американска возачка дозвола, дека не е бугарски државјанин и оти бил во земјата „не помалку од четири дена“.
Снимките од безбедносните камери на аеродромот прикажуваат маж, за кого полицијата верува дека е бомбашот, во облека типична за туристите, со долга коса, можеби перика и изгледа дека станува збор за белец.
Лекарите во неделата изјавија дека аутопсијата на телото на бомбашот самоубиец, осомничен за нападот во Бургас, покажува дека тој се разликува од мажот со арапски изглед, за кого очевидците тврдат дека е виновникот.
Лекарката Галина Милева по аутопсијата на телото изјави дека станува збор за маж со бело лице, светли очи и мошне густа кафена коса, како и дека коските на лицето му биле целосно уништени во експлозијата.
Израел за нападот ги обвинува Иран и либанската паравоена формација Хезболах, кои, пак, ја демантираа вмешаноста.
|
