Струјата поскапа за 9,83 отсто, а  парното од 3,13 отсто до 3,75

Регулаторната комисија за енергетика предлага цената на струјата за тарифните потрошувачи од 1 август годинава да се зголеми за 9,83 отсто. Од нив 3,76 отсто ќе бидат за ЕЛЕМ, а останатите за ЕВН снабдување.

Комисијата донела одлука да го ослободи АД ЕЛЕМ од обврската за покривање на недостигот од електрична енергија за тарифните потрошувачи од увоз и наместо ЕЛЕМ сега увозот на струја за тарифните потрошувачи ќе го прави ЕВН снабдување.

Како што истакна претседателот на Регулаторната комисија за енергетика Димитар Петров на денешната прес-конференција причина за зголемувањето на цената на електричната енергија е доставеното барање од ЕВН Македонија и ЕЛЕМ за зголемување на нивните трошоци во работењето за повеќе од 5 отсто во текот на годинава, а главна причина пак за тоа е зголемените трошоци поради увозот на електрична енергија во зимскиот период.

- Доколку се прифатеа барањата на компаниите за зголемување на цената на електричната енергија крајното зголемување за корисниците требаше да изнесува 19,78 проценти, рече Петров и додаде дека ЕВН Македонија во моментов се соочува со сериозна неликвидност и доцни во плаќањето на своите обврски.

Тој посочи дека ЕВН ги нема исплатено обврските кон ЕЛЕМ за мај, јуни и делумно за април од годинава.

Тоа, како што кажа било и една од главните причини поради која ЕЛЕМ побарала да биде ослободена од обврската за увоз на струја за тарифните потрошувачи која согласно новиот Закон за енергетика и припаѓа на ЕВН снабдување.

За увоз на струја биле потрошени околу 18 милијарди денари, а Регулаторната комисија за енергетика предвидела 680 илјади денари за таа намена.

Процентот на наплата на ЕВН Македонија, како што посочи во моментов изнесува околу 93 отсто, но неплатените сметки од 7 отсто се во износ од околу 14 милиони евра кои се главната причина за недоволната ликвидност на компанијата.

- До крајот на годинава можно е да нема ново преразгледување на цената на електричната енергија доколку компаниите повторно не приложат зголемени трошоци за над 5 отсто, рече Петров.

Во врска со цената на топлинската енергија во Скопје претседателот на РКЕ информира дека предложиле таа за крајните потрошувачи од први август да се зголеми за 3,13 отсто за оние што се приклучени на Топлификација, а 3,75 отсто за Топланата Скопје-Север, додека цената за ЕЛЕМ енергетика останува иста бидејќи воопшто не побарале зголемување.

- Доколку се прифатеа барањата на Топлификација за промена на цената за крајните корисници тоа ќе значеше поскапување од 36,45 отсто, рече Петров и додаде дека тоа се должи на зголемените варијабилни трошоци за гориво за 86 отсто.

Во врска со исклучените корисници од Топлификација посочи дека новата цената е пресметана врз основа на досегашниот конзум од 505 мегавати иако Топлификација пријавила конзум од 475 мегавати.

До крајов на месецов како што кажа треба да биде донесен и правилникот за топлинска енергија според кој к��рисниците кои што се исклучиле од системот ќе треба да плаќат 10 отсто од месечната цена од вообичаената цена за греење во колективните згради.

Доколку цел објект се исклучи граѓаните воопшто нема да бидат должни да плаќаат за топлинска енергија.