23.07.2012, 16:57 Небојша Стефановиќ нов претседател на српскиот Парламент
Кандидатот на Српската напредна партија (СНС) Небојша Стефановиќ денеска е избран за нов претседател на српскиот Парламент.
Неговиот избор го поддржаа 142 пратеника, против се изјаснија 48, а 15 биле воздржани.
Стефановиќ е еден од основачите на СНС, член на нејзиното Претседателство, потпретседател на Главниот одбор и шеф на белградскиот одбор на партијата.
Тој е роден во 1976 година во Белград, каде завршил Деветта белградска гимназија „Михајло Петровиќ Алас“ и дипломирал на Факултетот за бизнис студии на Мегатренд универзитетот. Лани магистрирал економски науки.
Работел во приватни фирми, кои се занимаваат со дистрибуирање на компјутерска опрема и маркетинг.
На изборите во мај оваа година е избран за пратеник во Собранието на Србија, а како пратеник на Српската радикална партија, чиј член бил пред основањето на СНС, го предводел парламентарниот Одбор за трговија и туризам.
Од 2004 до 2008 година бил советник во Собранието на град Белград, а моментално ја извршува и функцијата шеф на пратеничката група на СНС во градското собрание.
Зборува англиски и руски јазик, оженет е и има ќерка.
|
