Tројката денеска пристигнува во Атина

Претставници на Европската комисија, Европската централна банка и Меѓународниот монетарен фонд, попознати како Tројка, денеска ќе пристигнат во Атина во рамките на последната фаза од проценката на програмата за фискално прилагодување на Грција.

Премиерот Андонис Самарас во четврток попладне ќе се сретне со лидерите на коалициските партнери во владата- ПАСОК и Демократската левица, Евангелос Венизелос и Фотис Кувелис за да разговараат за намалување на 11,5 милијарди евра од трошоците за 2013 и 2014 година кои Атина ги подготвува за да ги исполни барањата на меѓународните кредитори.

Самарас во петок ќе се сретне со претставниците на Тројката, еден ден откако тие ќе имаат состанок со министерот за финансии Јанис Стурнарас.

Стурнарас вчера имаше долг состанок со високи функционери во Министерството за финансии во обид да се пронајдат уште 2,5 милијарди евра намалување на трошоците за 2013 и 2014 година.

По досегашните напори, предложени се повеќе мерки преку кои ќе се дојде до потребните 11,5 милијарди. Така, на пример, предложено е воведување плафон во пензиите со што ќе се заштедат 5,1 милијарди евра, комбинираните напори на разни министерства донесоа уште три милијарди евра, а преку други мерки собрани се уште една милијарда евра од вкупните 11,5 милијарди што треба да се заштедат.

Од друга страна, лидерот на најголемата грчка опозициска партија Сириза Алексис Ципрас ја повика Владата да престане да преговара со „тројката“ кредитори и предложи да се свика самит на ЕУ на кој ќе се разговара за поинаква стратегија за Грција.

Во обраќање пред парламентарната група на Сириза, Ципрас уште еднаш ја истакна одлучноста на неговата партија „за динамична акција против приватизацијата“.

Тој исто така ја обвини Владата дека губи време наместо да преговара, со што „ја прифаќа тоталната изолација на земјата“.

Според Ципрас, мора веднаш да се преземат итни мерки за банкрот затоа што програмата пропаднала. Тој нагласи дека „меморандумот банкротира и оти неговите архитекти, како што се ММФ, се првите кои ќе го напуштат бродот“.

- Ако германската канцеларка Меркел сака ние да банкротираме, ќе биде најдобро да ја предизвикаме самата да го каже тоа и да ги сноси последиците. Меморандумот и 72-те економски мерки кои беа најавени пред изборите ќе ја одведат земјата во социјален колапс и оние кои не го сфаќаат тоа едноставно се неспособни и опасни, нагласи Ципрас.