16.10.2011, 11:54 Парламентот и официјално го прекина пописот
Собранието на Република Македонија со гласови на парламентарното мнозинство синоќа го донесе Законот за престанување на важење на Законот за попис на населението, домаќинствата и становите во Република Македонија 2011 година, по скратена постапка.
Опозицијата по завршувањето на расправата по Предлог-законот ја напушти собраниската седница, по што, претседателот на Парламентот Трајко Вељаноски во два наврати даде пауза за обезбедување на потребниот кворум од 62 пратеника. Законот го поддржаа и мнозинството пратеници од заедниците кои не се мнозинство во Република Македонија.
Со законот, поднесен од Владата на Република Македонија, што беше единствена точка на дневниот ред на 12-та седница, се предлага престанување на важноста на Законот за попис, со што и официјално пописот се смета за прекинат.
Министерот за правда Блерим Беџети при образложувањето на одлуката на Владата, рече дека причините за донесување на овој закон се недоследности и недоречености во примената од одредби од Законот за попис како резултат на недоволниот временски период за подготовка и обучување на учесниците во спроведување на пописот во земјата, а посебно на реонските инструктори и попишувачи.
Беџети објасни дека со предложениот Закон, пописниот материјал собран за време на спроведувањето на пописот, Државниот завод за статистика ќе го уништи согласно на прописите за класифицирани информации. Направените трошоци, пак, во врска со спроведувањето во сила на Законот за попис ќе се исплатат од Државниот завод за статистика, кој, во рок од три месеци од влегувањето во сила на овој закон треба да поднесе извештај до Владата.
Расправата, која траеше три дена, ја одбележаа меѓусебни обвинувања и реплики на пратениците од владејачкото мнозинство кое смета дека прекинувањето е во интерес на државата и на меѓуетничките односи и опозицијата која бараше одговорност за прекинувањето на оваа најобемна статистичка операција.
Пратениците од ДПА ја напуштија седницата и не учествуваа во работата на оваа собраниска седница, поради тоа што не се отворил поширок политички дијалог за процесот на пописот и што парламентарното мнозинство не одржало претходни консултации за законот што е на дневен ред.
|
