14.10.2011, 15:04 Ставрески: Со капитални инвестиции против европската криза
Преку зголемени капитални инвестиции и прилив на свежи средства од странство по поволни услови е начинот на кој Македонија ќе се справува со ризикот што европската криза го носи врз македонската економија.
- Европа нема добро решение за оваа криза и ние сами треба да се справуваме со ризикот што европската криза го носи врз Македонија и да го правиме тоа како и досега. Треба да бидеме реални, да ги стегнеме сопствените сили она што можеме да го направиме за сопствената земја, никој од надвор не може да ни помогне. Сами треба да работиме за да си помогнеме и во тој дел Македонија има многукратно подобри перформанси од Грција и од која било земја во делот на економската стабилност, растот, во делот на задолженоста, изјави вицепремиерот и министер за финансии Зоран Ставрески одговорајќи на новинарски прашања по потпишувањето Договор за заем меѓу Град Скопје и ЕБОР за финансирање на реконструкцијата на улицата „Првомајска“.
Министерот додаде дека состојбата во Грција нема да се поправи на краток период и оти би било веројатно предимензионирано да се очекува дека некој некому нешто ќе надомести во о��нос на штетите што ги предизвикува кризата.
- Грција е во голем хаос во сопствените проблеми. Очигледно е дека Европа засега нема добро решение и би било добро Европа да ја пресече оваа криза, односно што побрзо да го официјализира банкротот, кој е извесен за Грција што ќе помогне да се стабилизираат пазарите, бидејќи се додека има ваква неизвесност ситуацијата нема да се подобри за овој регион, за Македонија, за ЈИЕ. Европските политичари конечно треба да си ја преземат одговорноста и да решат некои прашања освен што само ги дебатираат, истакна министерот и додаде дека ако Европа се плаши да го употреби нашето име во Извештајот не може да очекуваме дека ќе ни надомести некакви трошоци поради штрајк на грчките цариници. - Впрочем, како што рече, тие го знаеја тоа дека Грција е во лоша состојба и дозволија да се случи ова што се случи.
Во врска со износот кој е потрошен за Пописот, министерот Ставрески истакна дека законска обврска на Државната пописна комисија е во рок од три месеци да подготви извештај за вкупната реализација и износот на средства потребни за негова реализација.
|
