17.10.2011, 15:48 Владата ќе го зголемува нивото на електронска трговија
Владата преку имплементација на проектот „Македонските производи во светот - 100 електронски продавници за 100 македонски претприемачи“ ќе го зголемува нивото на електронска трговија во земјава.
Согласно проектот, преку министерствата за информатичко општество и администрација и за економија во 2012 и 2013 година за 100 новоотворени или веќе постоечки македонски фирми ќе се обезбеди развој, имплементација и хостирање на веб-станиците на 100 електронски продавници.
Идната година ќе се изработат виртуелни продавници за првите 50 претприемачи, кои ќе бидат обучени според најновите технолошки и интернет трендови со што ќе бидат подготвени да ги продаваат своите производи во Македонија, но и во светот. Претприемачите ќе бидат избрани на конкурс преку презентација на краток бизнис план за чија подготовка ќе им биде обезбеден примерок.
- Една од причините за малиот пазар на електронска трговија во Македонија е малиот број на електронски продавници. Не постојат никакви законски пречки за нивно функционирање, единствено нешто што недостасува е техничко предзнаење за целокупниот процес од воспоставување на системо�� за водење на нарачки до поврзување со процесот за плаќање со кредитни картички, појасни министерот за информатичко општество и администрација Иво Ивановски на денешната прес-конференција.
Министерот за економија Ваљон Сарачини проектот го оцени како уште еден чекор напред за подобрување на бизнис климата во земјава.
- Компаниите во Македонија преку имплементирање на концептот „електронска трговија“ конечно ќе можат да работат според принципот на електронска трговија, а со тоа и да можат да работат неограничено, односно 24/7 преку цела година, рече министерот Сарачини.
Тој посочи дека со воведувањето на електронската трговија значително се намалуваат режиските трошоци и трошоците за кирија, се обезбедува директен пристап до клиентите со елиминирање на посредниците и се обезбедува продажба во реално време.
- Реализацијата на овие активности ќе придонесе за подигнување на свеста за продавање и купување преку интернет, а со тоа и унапредување на електронската трговија и нејзино целосно функционирање во праксата, рече Сарачини.
Проектот предвидува во договор со избраните претрпиемачи да се сликаат производите, да се направи нивен опис, да се внесат податоци на македонски и на англиски јазик, како и да се овозможи натамошна нивна промоција и маркетинг на социјалните мрежи. За таа намена ќе биде ангажиран маркетинг експерт кој ќе ги обучи прептриемачите за стратегија за позиционирање на елементите на веб-страницата, а во 2013 се планира да се направи и „агрегатор“ кој ќе ги обедини сите производи од сите веб-страници на 100-те претприемачи во голема т.н. „суперстор македонска продавница“ налик на „Али баба“ во која ќе се овозможи и електронска трговија.
Во Македонија во оптек се 1,4 милиони кредитни картички, но обемот на електронска трговија во 2010 година кај македонските трговци изнесуваше само 80.000 евра, додека кон странските трговци беше дури 1,4 милиони евра.
|
