Хуманитарна трка во Бон за Македонија

Во Бон денеска се одржува голема хуманитарна трка, од која собраните средства се наменети за Македонија.

Ја организираат невладини организации, а покровител годинава е и градоначалникот на Бон, Јирген Нимпч (на фотографијата), пренесува Дојче веле - програма на македонски јазик.

Вообичаено, во трката учествуваат голем број училишта. Овојпат ќе трчаат 1.426 ученици од 16 училишта од Бон и околината.

Со донирањето средства се поддржуваат проектите на форумот "Граѓанска мировна служба" во конфликтни региони и се финансира работата на едукацијата за мир во Бон. И годинава со собраните средства ќе се поддржи работата на овој форум во Македонија. Ќе се организираат средби меѓу деца и младинци од различни ентитети и ќе се обучуваат медијатори во училиштата во Скопје, Струга и Кичево, кои ќе треба да ја превенираат ескалацијата на конфликтите меѓу етничките заедници.

Трката во Бон се одржува осма година по ред. Таа се организира и во други градови во Германија, но и во Македонија. Во изминатитет години на тој начин беа собирани донации од околу 27.000 евра.