Даблин не се откажува од Ерван Фуере



Ирското претседателство испрати индиректна порака до македонската влада дека екс амбасадорот ќе и дише во „вратот“

Испровоцирано од некои пишувањата во Македонија, ирското претседателство денеска реагираше со соопштение во кое ја објасни улогата на екс амбасадорот Ерван Фуере, нагласувајќи дека неговото искуство е многу драгоцено за Даблин и дека тука спаѓа и тоа стекнато во Македонија. Според споксменот на ирското претседателство, амбасадорот Фуере завршил значајна работа околу мировниот процес за Трансднестарскиот регион додека Ирска претседаваше со ОБСЕ, како резултат на неговото долгогодишно искуство во решавањето на конфликти.Напредокот што бил постигнат таму бил признат од сите страни и довел до усвојување на изјава од страна на министрите на ОБСЕ со која, за првпат по една деценија, бил утврден прогрес околу ова прашање.

„Иако не е предвидена формална улога за амбасадорот во однос на нашето претседателствување со ЕУ, бидејќи сега е во пензија и нема официјални должности, ние остануваме во близок контакт со него, со оглед на неговиот спектар на експертиза и неговото долгогодишно службување во ЕУ, а пред се како специјален претставник на ЕУ за Република Македонија“, стои во соопштението на ирското претседателство. (Н.Р.)