Меси го урна рекордот на Герд Милер стар 40 години



Ѕвездата на Барса постигна два гола во првите 25 минути на вчерашниот меч со Бетис (2:1) и со вкупно 86 голови го надмина германскиот голгетер Герд Милер кој во 1972 година постигна 85

Најдобриот светски фудбалер, ѕвездата на Барселона Лионел Меси постави нов рекорд за најмногу постигнати голови во една календарска година – 86. Аргентинскиот напаѓач постигна два гола во првите 25 минути на вчерашниот меч со Реал Бетис (2:1) и со тоа го урна рекордот на германскиот голгетер Герд Милер кој во 1972 година постигна 85 голови.

Оваа година 25-годишниот Меси даде 74 гола во дресот на Барселона и 12 како аргентински репрезентативец. Тој и оваа година е фаворит за наградата најдобар фудбалер на светот. Меси ја освојува Златната топка во изминативе три години. Ако ја добие и годинава, ќе стане прв фудбалер во историјата што ја добил наградата четири пати.

За истакнување покрај рекордот на Меси е и рекордот на Барселона, која ја оствари 14. победа во 15. коло од Примера за 43 бодови, шест повеќе од вториот Атлетико Мадрид.

„Сум рекол повеќе пати, убаво е да се соборуваат рекорди, но најважна е победата на тимот и бодовната разлика на врвот" - вели Меси.

„Моите цели се да освојувам титули со тимот, Примера, Шпанскиот Куп или Лигата на Шампионите се поважни трофеи од било кој мој личен рекорд".

Со оглед на тоа дека Барселона до крајот на оваа година ќе одигра уште четири меча, два во купот и два во првенството, Меси ќе има шанса да ја помести оваа граница на уште повисокот ниво, кое веројатно долги години нема да биде достигнато.