(ФОТО) Ракометарките немоќни и со Шведска



Пораз од 26:15 во второто коло на ЕП и покрај солидното прво полувреме, изгубено ао 11:8 дури во финишот

Од нашиот известувач
РОБЕРТ ДИМИТРИЕВСКИ

ФОТО: Денис Дуковски

НИШ - И покрај подобрата игра отколку на стартот на шампионатот, посебно во рпвото полувреме, женската ракометна репрезентација на Македонија забележа нов убедлив пораз на јубилејното 10. Европско првенство во Србија. Избраничките на селекторот Гино Стрезовски изгубија од Шведска со 26:15 во второто коло од групата Б во Ниш и останаа заковани на дното на табелата без бодови и со гол-разлика од -24. Сепак, шансите за пласман во втората фаза во Белград не се целосно загубени, бидејќи победа над Данска во последното коло в сабота од 20,15 ч. би можела да им го продолжи престојот во Србија на најдобр��те македонски ракометарки.

Неспоредливо подобро изгледаше играта на македонската репрезентација во првото полувреме во споредба со целиот стартен дуел со Франција. Навистина, и овој пат црвено-жолтите со серија технички грешки му дозволија на противникот рано да создаде значителна предност и да поведе со 7:2 во 11. минута, но овој пат Македонките не паднаа со духот. Продолжија борбено во одбраната, во својот стоти меч во националниот дрес се разбрани Тања Андреева и по седум минути Македонија намали на 7:5, а со голот на Робертина Мечевска од полуконтранапад во 27. минута се доближи на само еден гол негатива (8:9). Шведскиот селектор Торбјерн Клингвал беше принуден да побара тајм-аут, по кој Џесика Хелеберг и Џејмина Робертс ги одведоа "трите круни" на паузата со водство од 11:8, благодарение и на исклучувањето на две минути на Билјана Црвенкоска.

Македонките добро се носеа со европскиот вицешампион и во почетокот на вториот дел, кога одржуваа резултатски приклучок до 14:17 во 42. минута, но не најдоа лек во одбраната за левиот бек Линеа Торстенсон. Најдобриот играч на претходното ЕП 2010 во Норвешка и Данска постигна шест од првите седум гола на Шведска во вториот дел и, практично, сама ги откажа противничките ракометарки и од помислата за пресврт. Серијата од 5:0 за шест минути во средината од вториот период за зголемување на шведското водство на 22:14 дополнително ги деморализира македонските ракометарки. Тие постигнаа само еден гол во последните 18 минути и целосно го расипаа добриот впечаток што го оставија во првиот дел.

Македонија - Шведска 15:26

Полувреме: 8:11. Сала: СЦ "Чаир" во Ниш. Гледачи: 500. Судии: Столаровс и Личис од Летонија. Седмерци: Македонија 3/5, Шведска 3/3. Исклучувања: Македонија 4 мин., Шведска 2 мин. Загубени топки: Македонија 15, Шведска 17.

Македонија: Андреева 0/1 (10 одбрани), Наумоска, Мечевска 2/2, Саздовски 3/8, Мркиќ 0/1, Гроздановска, Младеновска, Ѓорѓиевска 0/1, Бајрамоска 4/13, Николиќ 1/8, Црвенкоска 3/7 (3/4), Пецевска 0/2, Папуџиева 2/5, Десподовска, Штериова 0/3, Митрова. Селектор: Гино Стрезовски.

Шведска: Олсон, Грубстрем (15+2 одбрани), Огрен 4/6, Флогнман, Фогелстрем 1/1, Блом 1/1, Робертс 2/4, Санд 1/1, Хавија-Свенсон 0/1, Вестберг 1/4, Алм, Торстенсон 8/12, Гулден 7/11 (3/3), Хелеберг 1/3, Вален, Јакобсен. Селектор: Торбјерн Клингвал.

СТРЕЗОВСКИ: ВИСТИНСКА СЛИКА

Гино Стрезовски: "Ова е вистинската слика за македонскиот женски ракомет. Добро се носевме во првото полувреме, за во второто да го покажеме нашето вистинско лице. Нападот воопшто не функционираше, а и одбраната попушти вов ториот дел. Мораме да се погледнеме в лице и да си признаеме дека и самиот пласман на ова ЕП е голем успех за нас".

Тања Андреева: "Покажавме две различни лица. Во првото полувреме одигравме одлична одбрана и затоа и резултатот беше активен. И во вториот дел почнавме на сличен начин, но потоа престанавме да го играме тоа што се договоривме на одморот. Но, се' уште ништо не е загубено - Данска останува нашата шанса за пласман во вториот круг".

Томас Сивертсон (помошник на селекторот на Шведска): "Задоволен сум од играта и од победата, бидејќи многу го респектиравме македонскиот тим. Игравме одлична одбрана во текот на сите 60 минути, нашата голманка бранеше одлично, но противнападот ни беше проблем во првиот дел".

Сесилија Грубстрем: "Второто полувреме беше нашето најдобро одиграно на ова првенство. Среќни сме поради победата, бидејќи имавме голем респект кон противникот".