Пешевски: Цената на бензините во Македонија е меѓу најниските во Европа



Тој го појасни начинот на формирање на цената која ја сочинуваат неколку компоненти

Цената на бензините во Македонија не ја утврдува Владата, туку Регулаторната комисија за енергетика согласно методологијата која што е усвоена и се движи со меѓународната пракса. Во моментов таа е меѓу најниските во Европа, изјави на денешната собраниска седница вицепремеиерот за економски прашања Владимир Пешевски одговарајќи на прашање од пратеникот Влатко Ѓорчев.

Тој го појасни начинот на формирање на цената која ја сочинуваат неколку компоненти - рафинериската цена на бензините, на која се додава ДДВ, акцизите, надомстоцитре за животна средина, за одржување на нафтените резерви, маржа за транспорт и маржата за дистрибутери. Ако се погледне влијанието на Владата, според него, тоа не е преголемо во секоја од овие компоненти на трошоците, но суштината е дека се почнува од рафинериската цена на нафтата која е дефинирана со посебен анекс кон купопродажниот договор за приватизација на ОКТА и која до денес не е променета.

- Историски во изминатите 12 години не е влезен параметар во пресметката за цената на нафтените деривати што ја прави РКЕ, освен покачување на надоместокот што Рафинерија го добива од 27 на 29 долари за преработка на нафтата во време кога министер беше Стевче Јакимовски. Останатиот дел не е променет иако ние како Влада настојуваме да ги смените тие цени во преговори, односно да повлијаеме колку што може да бидат пониски. За тоа ќе биде потребно да се седне на маса и согласност од другата страна, посочи Пешевски.

Владата, додаде, во делот на своите политики придонесува крајната цена на бензините да е на речиси најниско ниво во Европа.

- Ако ги погледнете останатите европски држави, цените просечно најчесто се движат за 20-30 проценти повеќе отколку во Македонија, односно околу 1,5 евра за литар, а некаде и до 1,8 евра. Она што Македонија го има како цена на бензините е меѓу најниските цени во Европа, и тоа како определба во делот на трошоците што ги контролира Владата ќе остане и понатаму, бидејќи генералната интенција е да се создаде таква цена на бензините што ќе биде поволна за стопанството, посочи вицепремиерот.