03.01.2012, 15:23 Сочувство за Глигоров од амбасадорите Волерс и Ивон
Во книгата на жалост за смртта на првиот претседател Киро Глигоров отворена во вила „Водно“ попладнево се запишаа амбасадорите на Соединетите Американски Држави и на Обединетото Кралство, Пол Волерс и Кристофер Ивон.
По запишувањето во книгата на жалост, американскиот амбасадор изјави дека Глигоров е пример за лидерство, прагматизам и решителност за решавање на проблемите за да се постигне повисока цел.
- Неговиот стил на ефикасно и прагматично водство треба да биде пример за многу лидери во регионот. Беше човек кој ја познаваше уметноста на политиката и на компромисот. Понекогаш е подобро да постигнете поголем дел од тоа што го сакате отколку да инсистирате на се, а да останете без ништо. Користејќи ја таа техника, ја воведе Македонија во Обединетите нации, рече амбасадорот Волерс.
Од име на својата држава, сочувство до македонскиот народ и до семејството Глигорови изрази и британскиот амбасадор Ивон.
- Уверен сум дека мнозинството граѓани на Македонија ќе се сеќаваат со топлина и почит на поранешниот претседател Глигоров, како и на наследството кое тој го остави - а тоа е мирна транзиција на земјата во независна држава која ја одбележа и 20-годишнината од независноста. Нашите мисли се со македонскиот народ, истакна амбасадорот Ивон.
Книгата на жалост во претседателкста вила „Водно“ е отворена за сите граѓани денеска до 20 и утре од 8 до 12 часот. Први во неа се потпишаа претседателот Ѓорге Иванов, претседателот на Собранието Трајко Вељаноски и претседателот на Владата Никола Груевски. Книги на жалост утре и задутре од 9 до 19 часот ќе бидат отворени и во народните канцеларии на Претседателот на Република Македонија во Скопје и Тетово.
|
