Македонија доби бугарски амбасадор со чисто досие



Нов бугарски амбасадор во Македонија ќе биде Иван Петков - објавија денеска кабинетите на премиерот Бојко Борисов и на претседателот Росен Плевнелиев. Петков ќе ја пополни веќе шест месеци празната амбасадорска фотелја во земјава, откако бугарската влада реши да ја лустрира дипломатијата и како соработници на разузнувачките служби повлече на триесет свои амабасадори низ светот, вклучувајќи го Лашев Раковски во Скопје.

Денеска претседателот, кој во петокот ја презеде функцијата, ја потпиша листата на 24 нови бугарски амбасадори, меѓу другите и за Виена, Атина, Пекинг и Брисел. Тоа значи дека Македонија ќе добие бугарски амбасадор со чисто досие, и дека неговата работа нема да биде оптоварена со политичката хипотека од минатото, бидејќи бугарската влада сака да расчисти со амбасадори што работеле за разузнувањето.

Петков е роден во 1953 година во градот Варна, а дипломирал на Институтот за меѓународни односи во Москва со специјалност "меѓународно право". Во Министерството за надворешни работи работел од 1979 година и бил амбасадор со специјални задачи за црноморскиот регион, специјален претставник на бугарското претседателство на Организацијата за црноморска економска соработка и заменик-министер за надворешни работи. Од февруари лани е директор на дирекцијата за човекови права. (С.Ј.)