Јавна расправија меѓу австралиската Влада и Бакингамската палата

Лондон - Австралиската Влада и Бакингамската Палата започнаа јавна расправија околу тоа кој ги платил трошоците за подароците што ги делеше британската кралица Елизабета за време на нејзината посета на Австралија во октомври минатата година, јави дописникот на МИА од Лондон.

Спорот настана откако портпаролот на австралиската Влада изјави дека сите подароци се платени од државниот буџет на Австралија, односно од џебот на австралиските даночни обврзници.

За време на посетата што тогаш и двете страни ја оценија како мошне успешна, кралицата подели рамки за слики и кутии изработрни од сребро за 40 угледни Австралијци, во вкупна вредност од 10.000 фунти.

Претставник на Бакингамската палата, меѓутоа, остро го демантираше тврдењето на австралиската Влада, објаснувајќи дека сите подароци што ги подели кралицата се платени од кралското домаќинство, а не од парите на австралиските даночни обврзници.

По изјавата од Лондон, одново реагираше Владата на Австралија, повторувајќи дека подароците се платени со „австралиски пари како што е тоа вообичаена пракса“.

Владата уште објави дека таа ги покрила и трошоците за престојот на кралицата и нејзиниот сопруг, принцот Филип, во вкупен износ од 650.000 фунти, како што тоа го направила и во 2005 година, кога за престојот на престолонаследникот Чарлс биле поторшено 200.000 фунти.

Во Австралија постои силно антимонархистичко движење па оваа расправија приврзаниците на идејата земјата да се откаже од доминионскиот статус и да стане република, ја искористија за силно промовирање на своите идеи. (МИА)