(ФОТО) Иванов: Позитивната пресуда во Хаг ќе влијае на НАТО-самитот



Претседателот и врховен командант на вооружените сили Ѓорге Иванов денеска ги посети Министерството за одбрана и Генералштабот на АРМ.

ФОТО: Петр Стојановски

Доколку имаме позитивна пресуда в понеделник од Меѓународниот суд на правдата во Хаг, очекуваме тоа да се одрази и на Самитот на НАТО, што треба да се одржи догодина во Чикаго, изјави претседателот и врховен командант на вооружените сили Ѓорге Иванов денеска по редовната работна посета во МО и ГШ на АРМ.

Одговарајќи на новинарското прашање какви се очекувањата за членството на Република Македонија во Алијансата на претстојниот Самит, тој потсети дека одлуката на Судот е поврзана со блокадата што и се случи на земјава на Самитот во Букурешт 2008 година.

На прашањето како ја оценува безбедносната состојба во Република Македонија, претседателот и врховен командант на вооружените сили, истакна дека надлежните институции ги следат состојбите во целиот регион.

- Случувањата во нашето опкружување, поединечни случаеви, ги сметаме за изолирани настани. Состојбите во северно Косово се надеваме дека ќе се решат преку дијалог, реч�� Иванов изразувајќи надеж дека целиот регион живее во поинаков амбиент, во кој Република Македонија има значаен придонес, за да не се повтори она што се случи пред 10 години.

Во фокусот на денешните разговори на претседателот и министерот за одбрана Фатмир Бесими денеска беа и новата формациска поставеност и ангажирањето на АРМ во меѓународните мисии во 2012 година, анализа на одбранбената дипломатија, буџетот на одбраната, како и приоритетите на Министерството за одбрана и АРМ за 2012 година.

Претседателот Иванов потенцира дека е за пофалба тоа што по неколку години намалување, за следната се претдвидува зголемување на одбранбениот буџет, а тоа, подвлече, ќе се одрази на севкупниот амбиент во АРМ, но и да се одбележи 20 години од постоењето како што доликува на Армија која е подготвена да биде членка на НАТО.

- Од нашиот удел и обврските кои ги имаме превземено и ги извршуваме, ние се однесуваме како да сме членка на НАТО. Нашите мировници продолжуваат во мировните мисии, а тоа особено важи за мисијата ИСАФ каде и следаната година се предвидува да имаме 161 претставник, а предвидено е да се зголеми и учеството во мировните операции предводени од ОН, изјави Иванов по редовната работна посета на МО и на ГШ на АРМ. Тој подвлече дека Армијата е институцијата во која граѓаните имаат најголема доверба, и тоа, рече, очекува да продолжи.